نشطاء عن "بيضة ونص المترو": رجعنا لعصر المقايضة

أثارت تصريحات وزير نقل الانقلاب هشام عرفات عن الزيادة الجديدة لتذكرة مترو الأنفاق، التي قال فيها إن سعر التذكرة يساوي "بيضة ونصف"، في حين أنها تساوي سبع بيضات في باريس، سخرية واسعة ونقدا لاذعا من قبل رواد مواقع التواصل الاجتماعي ننقل لكم جانبا منها.
حساب باسم "سندبا" كتب ساخرا، "طيب معاليك دي مشكلة لانك كده محتاج شعب بياض واحنا شعب يلد ولا يبيض".
فى حين كتب "آرك": ‎"كم بيضة تتدفع للرحلة من المرج إلى حلوان؟ لو تعرف قل لنا.. لو لا تعرف رتويت".
أما "كسكليون" فقد علق قائلا: "وفي حين أن المثل الصيني بيقول لا تضع البيض كله في تذكرة واحدة".
عمورى قال: قد ياتيك يوما لا تجد معك بيضه ونصف ثمن تذكرة مترو.
تبعته "إسراء محرم" التي قالت: وزير النقل ابو دم خفيف، بيقول سعر تذكرة المترو يشترى بيضه ونصف ف مصر ف باريس يشترى 7 بيضات.. عشان مرتب الموظف اللي ف باريس يشترى مزرعه فراخ بحالها اما الموظف المصرى ما يجبش قشرة البيضه حتى يا ظريف".
واستعاد أحدهم مشهدًا شهيرًا لسمير غانم من فيلم "يا رب ولد" فكتب: "احنا نجيب تذكرة مترو وناخد بدالها بيض، البيض يفقس يجيب كتاكيت الكتاكيت تكبر تبقى فراخ تبيض وتفقس وتبيض وانت تفقس واحنا نبيض فمنرفعش سعر التذكرة".
وجاءت مشاركة منى: "أسعار تذكرة المترو بالبيض ويخفق خفقاً جيداً ويترك ليبرد".
في حين وجّهت رانيا أسئلة مهمة: "‏وزير النقل سعر تذكرة المترو في مصر يساوي بيضة ونص طيب النص دا الناس تشتريه إزاي مسلوق ولا مقلي ويا ترى في ضريبة خدمة لسلق وقلي النص بيضة، عموماً منه لله اللي علمكم تتكلموا وتطلعوا تصريحات شبهكم، وعلى كل حال المترو في باريس مش مزبلة متحركة زي مصر يعني البيضة ونص كتير كمان عليكم".
وتحدث خالد إبراهيم عن عدم منطقية المقارنة: "وزير النقل.. سعر تذكرة المترو في مصر يشتري (بيضة) بينما سعرها في فرنسا يشتري (7 بيضات).. حضرتك المرتب في فرنسا يشتري (بقرة) إنما في مصر بيشتري (البيض بس)".
بينما غرد إبراهيم أبو أحمد: "وزير البيض رجعنا الى عصر المقايضة، بيضة ونصف خليها بيضتين".أما سامح بيك أنور فسخر قائلا: "معلش بس عمرنا ماسمعنا انى ممكن نشترى بيضه ونصف دى تكون دلواتى بتتباع مسلوقة مثلا ، ناس طيبين اوى ياخال".