نشطاء يتداولون 8 نصائح للخروج الآمن من مظاهرات الغد

تداول نشطاء على مواقع التواصل الاجتماعي عدة نصائح وجهوها لمن ينوون التظاهر غدًا الجمعة، فيما يعرف ب"انتفاضة الشباب المسلم".
قال أحد الشباب: عزيزي المتظاهر يوم 28 نوفمبر "إن شاء الله.. دي شوية اقتراحات يا ريت تاخد بيها وانت نازل:
1- يا ريت لو تاخد موبايل عادي وتحط عليه الأرقام اللي تهمك بس إنك تتواصل معاها.. وبلاش تليفونك "سمارت".
2- لو مش هتعرف تتصرف في تليفون ومضطر تنزل بتليفونك سمارت.. حاول تمسح كل الصور والأناشيد والأغاني الثورية.. ويا ريت تعمل تسجيل خروج من حساب فيس وتويتر.. علشان ما تتسببش في أذية نفسك وغيرك.
3- حاول تلبس كوتشي علشان يبقا مريح.. وكمان يساعدك ساعة الجري لو حصل كر وفر.
4- يا ريت يكون فيه مكان جيب بسوسته علشان تحط فيه الموبايل والفلوس وتحافظ عليهم إنهم يقعوا.
5- يا ريت البطاقة بس تكون معاك.. وبلاش أي ورق مكتوب فيه أسماء أو مواعيد أو أرقام تليفونات.
6- اعمل حسابك في خل وبيبسي علشان ضرب الغاز.. وربنا معاك بقا لو حصل ضرب نار حي.
7- حاول بقدر الإمكان لو حصل تفرق للمسيرة اللي هتكون فيها ماتمشيش لوحدك علشان ما تتمسكش بسهولة.
8- قبل كل ده صلِّ الفجر في جماعة بالمسجد.. وقل الأذكار.. واقرأ ولو صفحة من المصحف.. وصلِّ ركعتين قضاء حاجة.. وخلي أمك تدعيلك.. وتوكل على الله".