تضارب تصريحات "وزراء الانقلاب" حول تفجير المنصورة تثير سخرية رواد الإنترنت

سخر نشطاء ورواد مواقع التواصل الاجتماعى من خروج مجلس وزراء الانقلاب، عقب وقوع حادث الدقهلية قبيل فجر الثلاثاء، بشكل متضارب ما بين قرار باعتبار جماعة الإخوان المسلمين جماعة إرهابية ونفى لذلك، وأجمعوا على أن خروج تلك القرارات بهذه السرعة وعقب دقائق من الحادث يؤكد علمهم المسبق به.
وقال أحمد إنسان: "الببلاوى أعلن رسميًا الإخوان جماعة إرهابية بوظ الليلة كده المفروض يستنى التحقيقات أهو على الأقل تبقى مبلوعة شوية!! قرون استشعار عن بعد"، وأضاف آخر "الإخوان جماعة إرهابية اتخضينا بجد هو إيه اللى صحاه من النوم"، مجدى محمد كامل: "وبعد جدو الببلاوى ما يصحى ويقول الكلام اللى فات هنلاقى خبر عاجل جماعة أنصار بيت المقدس تعلن مسئوليتها عن تفجير مديرية أمن الدقهلية".
وكتب إسلام رمضان: "رئاسة وزراء الانقلاب تقرر رسميا اعتبار جماعة الإخوان المسلمين جماعة إرهابية.. طيب كان لازم تعملوا تفجيرات وتموتوا وتصيبوا المئات عشان القرار ده؟ كنتوا خدوا القرار من غير دم أبرياء"، وأوضح آخر: "السفارة الأمريكية سبق وحذرت رعاياها من احتمال وقوع انفجارات هما كل الناس كانت عارفة ما عدا الإخوان الإرهابيين؟!".
وقال سى سلامة عبد الحميد: "إعلان أن جماعة الإخوان جماعة إرهابية يعنى مفيش استفتاء.. وابقى سلملى على الاستكرار"، وأضاف آخر "الإخوان جماعة إرهابية، وتعرف الإخوانى إزاى؟ اللى شكله ما يعجبش الباشا الضابط يبقى إخوان. حتى لو مسيحى أو ملحد"، وكتب ناشط: "‏العادلى أسلوب حياة"، وأضاف محمود ممدوح: "هم بيعلنوا إن الإخوان جماعة إرهابية الساعة 3 بليل؟؟ ليه هم كانوا متفقين معاهم على العملية قبلها ولا إيه!! دجل".
وكتب سلفى ومش بكرهك: "إعلان الإخوان جماعة إرهابية شىء مفيد لسلطة فاشلة: كل يوم هيطلعولك يقولوا "القبض على 3 إرهابيين بالإسكندرية.. و4 فى المنوفية.. و5 ف..."، محمد أحمد: "هو فى غباااااء أكتر من كده يا جدعان يعنى الانفجار يحصل وبعده بأقل من ساعة يطلع رئيس الوزراء يعلن إن الإخوان جماعة إرهابية يا أخى طب اعمل حساب إن الى بيتفرجوا عليك عندهم لسه حبة عقل وممكن مش يصدقوك... يا رب بقى تكونوا فهمتوا الانفجار ده معمول ليه".
وقال آخر: "معنديش صحة أتناقش بس اللى بارك التفويض شاف أمان؟؟ لو باركتوا إن الإخوان جماعة إرهابية هايكون أغبى قرار اتاخد فى مصر"، توتى المناضل: "هو انتوا فاكرين إن الببلاوى صحى من النوم دلوقتى عشان يقول الإخوان جماعة إرهابية كله مترتب ومتظبط قبلها فجر اقتل اتهم وكل واحد عارف دوره!، عمرو عزت: "طبعا اعتبار الإخوان جماعة إرهابية هايبقى مفيد قانونا فى القبض على الصف التاسع من تنظيم الإخوان النشطين وسط طلاب المدارس الابتدائية والحضانات"، أحمد معروف: "طب بعد ما جماعة الإخوان بقت جماعة إرهابية... السؤال اللى بيطرح نفسه لو ظابط مسكك وقالك إنت إخوان... هتثبت إزاى إنك مش كده".