#تعرف_يا_بابا
إني آخر كل يوم..
بتخيّلك موجود هناك ..
واتخيلك موجود هنا
واتخيل انك لسه عايش وسطنا ..
بتبص لامي الصبح بصة طفل
تمسك إديها كأنكوا مراهقين ..
"اتنين ومهما بيكبروا بيحبوا بعض"
عواجيز قلوبهم لسه ف العشرين
عارف كمان..بفرح أوى
لو أمي قالت أني عنديه
"طالعة لابوكي واللي خلف عاش"
فيه حاجات كتير جوايا بداريها
مهما بحاول اقولها مبقولهاش
جوايا ضلمة وخوف من الأيام

أنا للأسف مبقتش بعرف أنام
كل أما احس بخوف أقول
لو بابا عايش كان زمانه عمل
لو بابا عايش كان زمانه حضر
أوقات بلومك ع الغياب جدا
رغم أننا مش أقوى أبدا
م القدر ماشى وسايب وسطنا تفاصيل
خليتنا طول الوقت نتألم
نضارتك المتسابة جوا الدرج
ساعتك وصوت رجليك على السلّم
أمي اللي عاشت طول حياتها صغيرة
وكأنها طفلة ف ليلة عيد
أول ما مت لقيتها فجأة عجزت
الوش يمكن لسه نفس الوش
لكن ف روحها طلعلها تجاعيد
أنا يوم عزاك .. كان نفسى يطلع "حلم"
كان نفسى أصحى بجد م اللي أنا فيه
ضهري انكسر يومها ومن يومها
ملقتش حد اسند حياتي عليه!
بتمنى إنى أحب حد يكون كده "شبهك"..
حنين رغم إنه شديد
يبقالي وقت الشدة ضهر وحضن
يبقالي وقت الوحدة "مسكة إيد"
أنا عايزة "أب يحبني".. وحبيب بدرجة أب
أنا قلبي ياما انكسر
فاجبر بخاطري يا رب
كان نفسى يوم فرحي تكون جنبي
تلمع عنيك فاحضنك ..
وامسك إيدك وأقول "بكره يا بابا هتبقى جدو خلاص"
شوف العيال كبرت أهيه على طول
وتبوسنى ف جبينى .. وإيدك على الطرحة تنزل دموع عيني
لكن دموع فرحة ..
الليلة ليلة العمر بتخيل إنك فيها
ويايا علشان دي لحظة هعيشها
من غيرك لكن إرادة ربنا تسيبنا ..
وإحنا يا بابا بحكمته راضيين
فيه أبهات عايشين لكن أموات
فيه أبهات أموات لكن عايشين