إلى الشخص اللي لسه مجاش..
حبيبى اللي ف علم الغيب

شريكي المنتظر إنه..
يكون قسمة وأمل ونصيب
ويبقى أربع حيطان ساندين..
وأهل وضهر وحماية
يكون نص الحياة والدين
وأصل وصورة ومرايه..
يغير لكن يكون واثق..
يخاف لكن يكون سندي
وأبقى أهم شيء عنده
فيبقى أهم شيء عندي
يكون وقت الخناق ليّن
سياسي وهادي وحنين
لا يجرحني ولا يهينّي
ولا يحسسني إني "جماد"
يكون عارف بإن الواحدة أحيانًا
بتاخد كل حاجة عناد..
فيتحمّلني لو قصّرت..
ويمسك إيدي ميسيبهاش
ويعرف إني أحيانًا..
بكون محتاجة أقول حاجة
ومش عارفة ف مبقولهاش..
وبرضه ببقى محتاجة
لحضن طويل..
وكلمة شكر..
وطيبة وطبطبة وحنان..
وإني ساعات بكون خايفة
ومحتاجة لدفا وأمان..
أنا طفلة.. وهفضل طفلة طول عمري
فمتقللش من قيمتي..
عشان أنا قيمتي من قيمتك..
وحاول بس تفهمني..
وهتحس إن أنا فهمتك

إلى الشخص اللي ممكن أكون
قابلته ولسه مش عارفة
بإنه هيبقى أبو ولادي
وجايز لسه مقابلتوش
وتجمعنا الحياة عادي
محدش عارف الدنيا
هتعمل أيه..
محدش فينا عارف حتى
فين وإزاي..
أنا واثقه بإنك جاي
ومستنية مهما تغيب
وعارفة إن اللقا ده نصيب
وإن معادنا مترتب
بأمر الله..
وواثقة ف ربنا وعارفة
بإنك بكره تبقى "حياة"