من صغري وأنا بأسمع عن قيمة الصداقة الحقيقية، وقيمة الصديق اللي لازم نختاره قبل الطريق، واتهريت تعاليم ومبادئ في الكتب اللي بتتكلم عن الصديق وقت الضيق، وإن البعد عن صديق السوء غنيمة، وغيرها كتير من العبارات الرنانة اللي كانت وفضلت مجرد حبر على ورق، أو حروف بتتناقل من لسان للتاني فى شكل نصيحة. لكن الحقيقة شئ تاني خالص، لما الكلمة تقرر إنها تتحول من مرحلة إنها مجرد كلمة لمرحلة الفعل، ساعتها لو حواليك أصدقاء كتير، ممكن يبقوا واحد بس وده كمان لو حظك حلو، وحتى الواحد اللي جنبك ده، ممكن هو كمان يختفي ويتلاشى في بعض الأحيان، وساعتها بس هتلاقي نفسك بتسأل هو يعني إيه صداقة؟.. هو مين في حياتي أقدر أقول عليه إنه صديقي؟.. وأنا واثق إنه عمره ما هيتخلى عني، سواء بقى إنه قرر يتخلى بمزاجه، أو بظروف غصب عنه.. المهم في النهاية إنه إتحط في خانة المتخليين عن جنابك. وده أسوء إحساس في الدنيا، إنك تكون فاكر إن حواليك ناس كتير، وتكون في أشد الحاجة ليهم، وفي الآخر تكتشف إنك وحيد ولا معاك صديق، وكمان ضللت الطريق.. يمكن ده أسوء من إنك تكون عارف من الأول إنك لوحدك. أقدر أقر وأعترف بمنتهى الشجاعة، لكن مش بمنتهى الفخر ولا حاجة، إننا دلوقتي نفتقد في حياتنا الإحساس بمعنى الصداقة الحقيقية، جايز المسمى إتوجد في حياتنا كتير، لكن تطبيقه للأسف لأ، مبيتذكرش إنه بيتوجد كتير، ولو إتوجد فممكن يكون لفترات محددة، وبيتشارك في التطبيق ده أكتر من شخصية على مراحل مختلفة من حياتنا. الخلاصة إننا مش بسهولة بنلاقي الصديق الوفي بمعنى الكلمة، وجايز منلاقيهوش خالص، ومش عارفة إيه السبب.. جايز العيب في اللي حوالينا، وجايز العيب في اختياراتنا، وجايز العيب فينا شخصيًا، إننا كمان مش أصدقاء بجد وبالتالي مش هنلاقي الصديق اللي بجد.. وجايز عشان مبقاش في حاجة أصلًا اسمها صداقة للأسف!. بس اللي أنا عارفاه بجد ومتأكدة منه، إن الصداقة اللي بجد إحساس جميل، مفيش أجمل من إنك تكون متعايش مع غيرك، وغيرك ده مش بالضرورة إنه يكون شبهك، لكن بالضرورة إنه يكون سندك في وقت ما تحتاجه، وسترك وقت مشاكلك، وعقلك وقت ما مخك يوقف عن التفكير.. إنه يكون متاح في كل وقت وأي وقت، وإن وجودك في حياته يبقى شئ أساسي مش شئ ثانوي، هي ديه الصداقة الحقيقية اللي ممكن تكون موجودة، لكن للأسف مش دايمًا بيحالفنا الحظ وبنقابلها. جايز ده يكون كلام مش على مزاج البعض، وجايز كمان يزعل ناس كتير.. مش عايزة حد يزعل لما يقرأ الكلام ده، لكن مفيش مانع إن كل واحد يراجع نفسه ويعيد حساباته، ويشوف هو قصر في إيه مع "أصدقاؤه"، ومع الناس اللي اتعشموا فيه، واللي ممكن جدًا يكونوا بعدوا عنه، لكن لسه مش عايزين يخسروه، ولسه بيدوروا على الصداقة اللي بجد.. التطبيق مش المسمى.