اتأثرت جدًا النهارده أنا وغيري بمشاهد الفنانة زينة وهي مع رامز جلال في برنامجه لما حست إنها خلاص هتموت والطيارة خلاص بتقع!!!!! زينة اللي أقامت علاقة غير شرعية، لما حسّت إنها بتموت اتشاهدت!!!! سبحان الله!!!!!! كان عندها إيمان بعدالة ربنا وسماحته ورحمته، ماخافتش من سوء الخاتمة ولاعذاب القبر ولا من نار جهنم اللي مستنياها عشان ذنبها اللي مايتغفرش!!!!! كانت متأكدة إن ربنا أحن وأرحم عليها من البشر اللي دبحوها !!!! زينة وهي حاسة إنها بتموت ما فكرتش غير في ولادها، قعدت تقول يا رب ولادي!!! ولادي مالهمش غيري يا رب!!! إحساس أم مدبوحة على ولادها اللي اتدمّر مستقبلهم بسبب أب خسيس وظالم، إحساس أنا وغيري من الأمهات نفهمه كويس قوي، وتفهمه أكتر الست اللي ولادها من غير أب، لأن ماعندهاش حد تقول له خللي بالك من ولادنا. زينة اللي اعترفت بغلطها واتحملت نتيجته بكل شجاعة، ووقفت في وش المجتمع الذكوري المتدين ظاهريًا، وكافحت لحد ما أثبتت نسب أولادها من علاقة دفعت تمنها غالي قوي من سمعتها وكرامتها، شربت مرارة التجريح والإهانة، وصممت إنهم ولاده وطلعوا فعلاً ولاده. زينة اللي كانت أقوى من أحمد عز في الاعتراف بالخطأ، مع إنها من مجتمع بيرجم المرأة المخطئة وبيبرر للرجل خطأه، زينة بكل قوتها اللي شوفناها الأيام اللي فاتت في تحدي المجتمع وإثبات نسب ولادها، النهارده بان ضعفها وكسرتها على أولادها ومصيرهم من بعدها لأنها عارفة إن ملهومش غيرها في مجتمع مابيرحمش الضعيف. يمكن في كتير منكم مش هيعجبهم كلامي، وهيشوفوا إني بدافع عن إنسانة مخطئة، لكن أنا متأكدة إن كتير هيفهموا كلامي وهيحسوا باللي حسيت بيه لما شوفت خوفها على ولادها بسبب إن ملهمش غيرها، إحساس إنسانة مش خايفة من الموت نفسه، إحساس أم شايلة هم مصير ولادها من بعدها. ارفعي راسك يا زينة، حتى لو كنتي غلطتي، يكفيكي شرف الاعتراف بالخطأ، يكفيكي تحمل نتيجة غلطتك وتمسكك بأولادك وإثبات حقهم، يكفيكي أمومتك العظيمة اللي خلتك النهارده ما تخافيش من الموت وماتفكريش غير في ولادك. رغم كل حاجة حصلت يا زينة، انتي بشر زيك زينا كلنا، كل ذنبك إنك شخصية مشهورة، بس شجاعتك في اعترافك ومواجهتك خلتك بقيتي نموذج يستحق التقدير لأنك ما استسلمتيش ورضيتي إن حق ولادك يضيع. خلاص يا زينة... بقيتي غالية علينا!!!!!!!!!
