تى تى تاتا والمصرية للاشتغالات!

شركة «تى تى تاتا» لخدمات الدى إس إل! آه والله تصدقوا! طلعوا بتوع إنترنت وإحنا اللى كنا مش واخدين بالنا!.. وإليكم أيها السادة سيناريو العميل اللى النت يا عينى قاطع عنده بالرغم إنه دافع الفاتورة لما يغلط ويكلم «خدمة» العملاء.. أول ما بيتصل بيبتدى يسمع فى إسطوانة بيرددها صوت مداماتى مستفز داكن ذو بحة حكومية روتينية بيقول: مع خدمة «سوبر سابورت» تقدر تلك لك لك بلا بلا بلاااا بلاا»، وبعديها «أمامك مدة انتظار لا تزيد على 6 سنين.. تيرارارراااااااا، ثم مزيكا سخيفة، ثم حدوتة سوبر سابورت»، وفجأة يرد الجميل البرنس ذو نكهة وروقان البطيخ وانسجام الفواكه الاستوائية!
العميل: ألوو حضرتك أنا النت قاطع عندى.
الموظف: طيب حضرتك ممكن تشرفنى بالرقم اللى عليه الخدمة.
العميل: اتفضل؟؟؟؟؟؟؟؟؟؟؟؟
الموظف: كود المحافظة لو سمحت؟
العميل: ما أنا قلتلك 02 كنت بقول لحضرتك النت قاطع عندى بقالو أسبوعين.
وهنا يرد الجميل، ويقول: طب هو حضرتك دفعت الاشتراك؟
العميل: آه طبعاً.
الموظف: طيب هو حضرتك عندك علم بطرق وأماكن سداد الفاتورة؟
بيبتدى العميل يتنرفز فيقوله: بقول لحضرتك دفعت.. دفعت خلاص والنت قاطع!
وهنا يزداد الرشيق جمالاً، ويتألق وهو بيقول الجملة الأساسية عند «تى تى تاتا» اللى هى: أنا آسف لحضرتك أصل السيستم واقع وأنا مش هقدر أدى لحضرتك أى بيانات.. تقدر حضرتك تكلمنا بعد ساعتين.
العميل ساعتها بيحاول يعمل ابن ناس وبيقفل من غير ما يزعق.. بيرجع فعلاً يتصل بعد ساعتين، فبيرد عليه عسول تانى ويبتدوا فى حوار الكود والرقم وبعد كده بيبدأ الموظف فى ترديد الجمل دية: معلش بس أتابع معاك اقفل راوتر.. افتح راوتر.. افتح بقك.. اقفل بقك.. هو الراوتر واصل على السلك الأساسى للتليفون.. طب إنتوا داهنين الحيطان يوتن ولا سكيب؟ طيب حضرتك صليت الضهر؟ طيب تالت لمبة على إيدك الشمال فى الراوتر بتنور وتطفى ولا بتطفى وتنور؟.. اقفل النور.. افتح الأباجورة.. ادخل خد دش.. طيب جرب تستخدم سائل استحمام «فا».. نام على جنبك اليمين.. إقرى الأذكار.. حضرتك اتغديت ملوخية؟ مممم التوم اللى فى الطشة بيقطع الخدمة يا أفندم.. عموماً إحنا هنتابع معاك وإن شاء الله ابقى تف على خلقتنا لو النت جالك.. شكراً يا فندم كان معاك ممدوح من «تى تى تاتا».. وبعد فترة المتابعة اللى ملهاش أى لزمة بتلاقى شخص تانى بس بنفس سماجة ممدوح بيرد عليك ويقولك «حضرتك إحنا بنواجه مشكلة فى أجهزتنا اللى فى السنترال ومدة الإصلاح هى 48 سنة عمل باستثناء الأيام العادية والعطلات والأسبوع كله».
أتحدى لو فى بيت فى مصر متعرضش لحرب الاستنزاف والاستنطاع اللى بتمارسها الشركة ديه!
سؤال وجودى ذو طابع أتوماتيكى بيطرح نفسه هى الشركة دية فاتحة ليه؟ ولا بتقدم إنترنت عِدل.. ولا عندها خدمة عملا عدلة قالك طلقة! جاك طلقة تشيلكوا!
أرجوكم اعتقونا من الممارسات المبتذلة اللى بتروقنا بيها شركات الإنترنت وأولها الشركة الأم الراعى الرسمى لاقفل الراوتر وافتحه تانى «تى تى تاتا».. ارحمونا! يعنى ولا حرية ولا أكل نضيف ولا شغل ولا إنترنت كمان! عايزين نتفرج عاليوتيوب يا جدعان عايزين نشوف سمر عملت إيه فى عدنان بيك! وآهى حاجة تلهينا بدل ما نبقى فاضيين ونخنقكم ونحشر نفسنا فى سياسة بلدكم! الله!
إنتوا أحرار اللهم بلغت! الشعب لو ملقاش الراوتر وملقاش شاهد هذا المقطع قبل الحذف ولا فيلم حلاوة روح كاملاً هيتدخل فيما «يعنيه» وهترجعوا تشتكوا!
معاً ضد استغلال تى تى تاتا والمصرية للاشتغالات.. معاً ضد السيستم اللى علطول واقع.. معاً ضد سياسة اقفل الراوتر وافتحه تانى.. يلا سلام عليكم.