أولاد الضياع

ما تحسبش اللى ضاع
واللى باع عرضه بلقمة
واللى سرق لاجل هدمة
يستر بيها جتته
ما تحسبش اللى يوم
سبته نايم ع الرصيف
يخطف عضمة ورغيف
من كلاب حتته
وإن فكر يوم يحلى زيّنا
ينقى من الزبالة فاكهته
ما تحسبش اللى ما يعرفش الحنان
واللى قلبه جامد جبان
ضاعوا أهله وعزوته
ماتت فيه حاجات كتير
منها يا ناس نخوته
لا يعرف وطن ولا انتماء
ولا تاريخ لأمته
أم داست يوم عليه
ولا فكرتش فى محنته
عاشت زمانها فى برج عالى
ودنيا تانية غير دنيته
ازاى يفكر هو فيها
اللى زمان قست عليه
وللضياع سلمته
يرسم ويفصل فيه
ده حرامى ده بلطجى حشاش
ده إرهابى بصمجى
باع كرامته وعفته
والمصيبة هى عارفة
إنه منها فى مشيته
لهجته حتى جنسيتها
فى البطاقة جنسيته
ما تحاسبهوش حاسبوا اللى خانوا براءته
وكسروا لعبة طفولته
وحرموه يركب مراجيح حريته
حاسبوا اللى سحلوا الطهر فيه
وشوهوا مصريته
ويا ريت بسرعة تلحقوا
ترجعوه وتعوضوه
عن غلطة كانت مش غلطته