شوف: كلمات اغاني فيلم محمد سعد الجديد"تك تك بوم" في العيد

خلص الفنان "محمد سعد " تسجيل أغنيتين هم "برنس العالم "، "ولو كنت رئيس" وده عشان فيلمه الجديد "تك تك بووم "، الأغاني من كلمات " إسلام خليل " وألحان " هاني فاروق " ومن توزيع أشرف البرنس، وقدر موقع Ofann إنه يجيب كلمات أغنية " لو كنت رئيس " .. وبتقول كلمات الأغنية :
" أه لو كنت رئيس .. كنت يا ترى هبقى حسيس .. على بلدى وشعبى حريص .. ولا هخبط و هشوط .. يا ترى هاخدم وهاساعد .. ولا مع الشر هتواعد .. وأفضل ماسك وقاعد على الكرسى لحد ماموت ..
أه لو كنت رئيس .. كنت هاخربها وهادوسها .. كل يوم أسرق فلوسها .. ولا هاحضونها وأبوسها .. وأبقى جارها وعنها أحوش .. كنت هبقى صاحب كويس ولا بس الإسم ريس .. كل يوم عالشعب أميِس واللى أقوله ما نفذوش
أه لو كنت رئيس .. كنت أدور على الغلابة .. اللى موش لاقين إجابة للتعاسة وللكأبة واللى نايمين على الرصيف .. كنت أفكر فى اللى ضاعو .. اللى فسدوا واللى باعو .. فى اللى تعبوا واللى جاعوا .. واللى موش لاقين رغيف
أنا شعبى لازم يدلع .. لازم يشبع ويبلع .. دا أنا دا أنا شعبى لازم يدلع .. لازم يشبع ويبلع .. أنا شعبى لازم يدلع .. لازم يشبع ويبلع
واللى يكرهنا يولع إنشالله يروح فى طيس
أه لو كنت رئيس .. المريض هنزيل وشوفوه .. والفقير هعرف ظروفه .. وبقى واحد من ضيوفه الغلابة المحتاجين .. أمشى أحاسب امشى اداوى .. أمشى وأسمع فى الحكاوى .. دا الشباب ماليا القهاوى .. عدو سن الأربعين
أه لو كنت رئيس .. كنت هاحكم بالعدالة .. ولا أكون أخر ندالة .. ناس بتاكل من الزبالة .. وغيرها عايش فى القصور .. كنت هبنى وهاعلا بيها .. ولا أخونها وأهد فيها .. أبقى معنى الأمن ليها .. ولا هاياخدنى الغرور ..
أه لو كنت رئيس .. أنا شعبى لازم يدلع .. لازم يشبع ويبلع .. دا أنا دا أنا شعبى لازم يدلع .. لازم يشبع ويبلع .. أنا شعبى لازم يدلع .. لازم يشبع ويبلع
واللى يكرهنا يولع إنشالله يروح فى طيس ..أه لو كنت رئيس "
فيلم "تك .. تك .. بووم " من بطولة محمد سعد، درة، لطفي لبيب، سليمان عيد، محمد لطفي، فكرة إسعاد يونس، سيناريو وحوار محمد سعد ومن إخراج أشرف فايق وهيبدأ عرض بالسينمات في عيد الفطر.