لماذا أعترض علي ما يقوله بعض خطباء الجمعة؟

زمان وأنا صغير "قد عشر سنين كده" كنت أستغرب أوي من الناس اللي راكنة علي أي حيطة أو عامود ونايمة بينما الخطيب بيقطع في نفسه علي المنبر.
بمرور السنين وجدت نفسي وقد أصبحت عضوا في نادي النائمين أثناء خطبة الجمعة أدخل المسجد أنقي أحسن عامود في الصفوف الخلفية ويا حبذا يكون جنب المروحة وأبدأ رحلة النوم لغاية ما حد من ولاد الحلال اللي جنبي يصحيني علشان نصلي ده لو مفيش حد رخم عليّ وصحاني في نص الخطبة.
طبعا الموضوع ده كان ساعات بيعمل لي مشاكل يعني مرة من المرات الخطيب زعق في الراجل اللي جنبي وقاله انت ياعم صحي الراجل اللي نايم جنبك ده ومرة صحيت لقيت كل اللي حواليا بيبصولي بغضب شديد" عرفت بعدها من صاحبي إني كنت بشخر بصوت عالي ده غير اللي يرمي كلمة ويقولك هو انتم معندكوش سرير في بيتكم ولا إيه.
حضرتك ممكن تستنكر علي السلوك ده لكن قولي بالله عليك أعمل إيه وأنا واحد عايز يؤدي الفريضة اللي عليه لكن بيروح الخطبة يلاقي الخطيب بيعيد ويزيد في نفس الكلام لدرجة أن الخطيب ذات مرة قال نفس الخطبة بتاعة الجمعة اللي قبليها "ومحدش حس" أصل العناصر بتاعة كل مرة محفوظة ومعروفة شتيمة في المسلمين اللي ضيعوا دينهم.. وشتيمة في الغرب اللي خلي المسلمين يضيعوا دينهم..
والله لو ألاقي خطبة بتتكلم عن أوضاعنا واللي إحنا فيه عن بلدنا اللي بتتنهب عن الفساد اللي بالطول والعرض وعن مشاكل حياتنا وازاي نحلها بطرق عملية مش بالدروشة كنت قعدت واستمعت غصب عني.
في خطبة الجمعة اللي فاتت قررت أصحي من النوم أسمع الخطيب بيقول إيه لقيت بقي خير اللهم اجعله خير الخطيب نفي صفة الإيمان عن أمة الإسلام كلها وقال خلاص مفيش مؤمنين علي الأرض ولو فيه مؤمنين كان ربنا نزل علينا نصره.
وحل كل مشاكل مصر كلها لما قال لو كنا مؤمنين كان كل حاجة اتحلت كان البنزين رخص والأجرة رخصت والسكر رخص.
وبمنتهي الغرابة الخطيب العجيب فسر لنا ليه الغرب متقدم والمسلمين متأخرين بيقول إن تأخرنا ده عقاب من ربنا علشان نتعلم نبقي كويسين.
في النهاية بقولكم اللي يلاقي الخطيب ده يا جماعة يا ريت يقوللي عليه وعنواني سهل ما يتوهش كل جمعة آخر عمود علي إيدك اليمن وأنت داخل جنب القلل علي طول.