اقلعى الحجاب يا معقدة!

«إيه ده هو انت محجبة! لا ما هو يا تتحجبى صح يا تقلعيه! يعنى متر القماش ده اللى هيدخلك الجنة؟»
3 جمل ممتلئة «تلزيق، تخلف، نفسنة، ادعاء تحضر ونضافة»!
ليه بتقبلوا البنت اللى مبتصليش واللى مقضياها نميمة وهى صايمة وحتى بتقبلوا البنت «الشمال» مدعين أنها أخلاقها وهى حرة فيها! بتقبلوا الشاب اللى بيشرب خمرة والمدمن وكل ده الرد عليه بيكون «ربنا يهديهم» لكن بتيجى بقى لحد المحجبة اللى حجابها مش صح وتطلّع «الشعراوى» اللى جواك! سيادتك الدين درجات ومش معنى أن المحجبة حجابها مش صح فحضرتك تدخل مناخيرك جوه السبانيش بتاعتها وتقرر أن «القلع» هو الحل! لو هنمشى بمبدأ إننا نسيب كل حاجة مابنعملهاش صح يبقى بقى لو انت مش مسلم صح سيب الإسلام كله!
بنات كتير وأنا منهم بنزهق من نفس الشكل مش من «الحجاب»!.. قلعت الطرحة ولبست البونيه الشهير بالتربون وضربت العقد العريض والبنطلون الفلورال.. لبست السكيرت اللى كانت طالعة موضة.. لبست الألوان النيون اللى كانت قالبة الدنيا.. فرحت أنى بالرغم من أنى محجبة إن شكلى اختلف.. هتقول «معاناة بنت محجبة ومكلكعة ومعقدة» هضحك وأقول لك «انت مالك خليك فى حالك»! نفسى أفهم ليه لما بنت بشعرها بتروح تقصه أو تصبغه بتقول عليها «بتجدد» ولما بنت محجبة بتغير من نفسها بتقول عليها «عايزة تقلعه»! من الآخر البنت مننا مابتفرحش لأنها لابسة ضيق أو حتة من رقبتها باينة لأ بتفرح لأنها «جددت وشكلها اختلف».. أكيد وقت ما ضربتى السبانيش قابلتى مجموعة بتبغبغ «لا ما هو يا تلبسى حجاب صح يا تقلعيه!» أكيد غصب عنك ابتديتى تضعفى من جواكى.. طب صحيح هى جت على شعرى! عديت زيك بالمرحلة دى ووقتها اتخنقت من نفسى لما لقيت نفسى بقول «طب صحيح ما أفكه وخلاص»! وقتها قررت أشوف «أنا عايزة إيه؟» لقيت إنى لأ مش عايزة أقلع الحجاب وأسمع كلام الناس.. ولا عارفة أريح الناس وألبس لبس الحجاب الصح.. صارحت نفسى بعيوبى إن آه حجابى مش صح بس والله أنا مش عايزة أقلعه ولما أقدر ألبس صح هلبس صح عشان ربنا، مش عشان شوية «حشريين»، وأعتقد أن ده حال بنات كتير برضه.. وقتها قررت إنى هفضل محجبة وهلبس اللى أنا عايزاه وهنا جت كلمة «طظ» لترد على المعترضين! عزيزى الحشرى شيل مناخيرك من تربونى!
عزيزاتى السبانش والتربون والسكينى ستايل.. عزيزاتى اللى من فوق «عمرو خالد» ومن تحت «عمرو دياب» ولا يهمك من كلام وتريقة الناس، يكفينا أن إحنا عارفين إننا مقصّرين فى حق ربنا وإن شاء الله ربنا يكرمنا ونصلح حجابنا.. ولحد ما ربنا يهدينا خلونا نفوق عالحشريين بتوع «يا تلبسى حجاب صح يا تقلعيه» بما أنك بتتكلم بمبدأ يا نعمل الحاجة صح يا مانعملهاش يبقى اسمعنى يا حبّوب:
يا تصلى صح يا تبطل.. يا تصوم صح يا تبطل.. يا تبقى زوج صح يا تبطل.
رسالة للفلاسفة أنا مابقولش لحد يتحجب ولا بقول لحد ميقلعش الحجاب! اللى عايز يقلع يقلع واللى لابس سيبوه فى حاله واتكتموا!
ورسالة أخيرة للجميل الشيك الداعى لمظاهرة خلع الحجاب فى التحرير.. أقترح عليك تاخد «شاور» يمكن لما تنضف ساعتها تتشهر.