الشنبات تتحدث: لبس البنات بقى توليفة

كيف ينظر الشباب إلى المحجبة بشكل عام، ومحجبة هذه الأيام خاص التى جسدها الفنان الكبير فى أحد رسوماته الكاريكاتورية وهى ترتدى الطرحة من أعلى، ومن أسفل بنطلون ضيق لدرجة تبرز تفاصيلها بالكامل، وصاحب رسمه بتعليق شديد السخرية : «من فوق هلا هلا.. ومن تحت يعلم الله».
حمدى «26 سنة» مهندس، يقول: «أنا باشوف بنات محجبات لابسين ملابس ضيقة، وبيحطوا ماكياج صارخ وفى رأيى كده بتسىء للحجاب.. يا تتحجب صح.. يا متتحجبش» . ويضيف: «بالنسبة ليا مش لازم أرتبط بفتاة تكون محجبة أساسا.. المهم تكون أخلاقها كويسة، ولكن بعد الزواج لازم مراتى تتحجب.. وهذا قرار لا يمكن التراجع عنه».
ياسر «25 سنة» ويعمل فى إحدى شركات البترول، يوجه انتقادات عنيفة للفتيات المحجبات اللاتى يرتدين ملابس غير لائقة، ويقول: أنا شايف إن فيه بنات بتلبس الحجاب عياقة ومنظرة، لأن البنت المحجبة مش المفروض أبدا تلبس ملابس ضيقة، وتحط ماكياج لأنه ما ينفعش التبرج مع الحجاب، والمفروض إن المحجبة ماتكونش ملفتة، وفى رأيى لو البنت مش عارفة يعنى إيه حجاب ماتتحجبش، لأنه ليس فقط غطاء للرأس».
ويضيف: «الحجاب حرية شخصية، ولن أفرضه على زوجتى إلا إذا كان ذلك يمثل رغبتها.. هنا ساترك لها حرية الاختيار. براحتها دى حاجة بينها وبين ربنا ولا دخل لى بذلك».
طارق «26 سنة» يعمل فى أحد البنوك، يقول: «أنا باشوف بنات محجبة بتكون ملفتة أكتر من البنات غير المحجبة.. يبقى بيتحجبوا ليه؟.. عشان بس يغطوا شعرهم؟.. مايتحجبوش أحسن، فالحجاب يعنى الاعتدال فى كل شىء وليس فقط غطاء للرأس، ومش مهم عندى تكون الفتاة محجبة فقط.. الأهم تكون عارفة دينها كويس وعندها أخلاق، وبالتأكيد ساعتها حتتحجب من نفسها حجاب سليم».
حسين «27سنة» موظف، يقول: «ده حجاب ده؟.. أنا باستغرب إزاى هما محجبات وبيعملوا كده أنا رأيى يايتحجبوا صح يا ميتحجبوش». ويضيف: «مش شرط البنت اللى أختارها وأرتبط بيها تكون محجبة، المهم تكون بنت كويسة وبتراعى ربنا.. لكن بعد الجواز تتحجب حتى تكون قدوة حسنة لأولادى».