لما بمسي عليه.. قصيدة ل"زهرة مصطفى"

لما بمسي عليه وبصبح
بلقى الدنيا فى شكل جديد
زي البنت في يوم العيد
تضحك فرحة
بعيون صافية
شكل الوردة في البساتين
أبيض.. أصفر
أخضر.. أزرق
وفيونكاتها الحمرا تطير
لما النسمة تلاعب روحها
كده ضفايرها شمال ويمين
لابسه ساعتها
تقول شبكتها
حتى الشنطة في إيدها
جميلة
بتغري بلونها عيون صحباتها
ده لما بمسي عليه وبصبح
كل جمال الدنيا بيرجع
زي الفرحه فى ليلة العيد
والبنوتة الصاحية تدور
فين التوكة والبلالين
عاوزة تجري
تلعب تفرح
بس انا خايفة
يجي اليوم
أصحى أدور
ضاعت مني
فرحة عيدي
القى الحلم
كأنه كابوس
والبنوته الحلوة
تعدي
بس عيونها
خوف ودموع ..