"سلطان" في آخر لقاءاته مع "صاحبة السعادة": "النقابة مطيّبتش بخاطري"

"شيء يبكي لما اللي يضحكك من جواه بيبكي"... بهذه الكلمات افتتحت الإعلامية إسعاد يونس حلقتها مع المونولوجيست الراحل حمادة سلطان، في آخر حلقاته معها منذ شهرين، الاثنين 23 يناير، واستكملت "صاحبة السعادة"، وقالت: "حابس الدمعة في قلبه بس راسم ليك وش بيضحك بس عشان تضحك قالوا عليه ملك النكتة 55 فن وضحك ونكت... مش مطلوب منه أبدًا يبكي لوحده".
قال حمادة سلطان صاروخ النكتة، كما أطلقوا عليه، تربيت مع إخواتي في شبرا، وأخي مصطفى عبدالغالى كان أحد عباقرة الكرة المصرية في عصره المدير الفني لفريق سيريليون.
أما عن لقب "صاروخ النكتة"، قال الراحل سلطان، ظهرت في عام 67، وقت الحرب في الجبهة كانت لغة الحرب هي لغة الشارع السائدة، لذا أطلقوا عليّ صاروخ النكتة، وأنا أعتز بهذا اللقب حتى وقتنا هذا، ثم رشحني علي فايق زغلول لأضواء المدينة، ودخلت الهواة عام 1955، والهواة كان لها قيمة زمان، ثم تحدث عن الفنان شكوكو، قائلًا: امتدت صداقتي به أكثر من 38 عامًا وكنت اتقبل العزاء معه، راويًا ذكرياته معه وقال: "شكوكو لديه ولدين أحدهم إسمه سلطان والآخر حمادة، و"ولما كنت أدخل عليه يقولي ولادي جم".
واستكمل: "عندي عقد إنجليزي بينى وبني الحكومة الإنجليزية لم أنفذه كان زماني معايا جنسية إنجليزية دلوقتي، ورفضته.. العقد ده كانت النقابة بيه هتشغلني".
وفي الحديث عن نقابة المهن التمثيلية ونقابة الموسيقيين، أعرب سلطان عن حزنه واستيائه من أداء النقابة تجاهه قائلًا: "النقابة بتاعتني حتى وقتنا هذا مفيش مندوب جيه طيّب خاطري بكلمتين ولا طبطب عليا، وأشرف عبدالغفور كلم بنتي، وكل واحد تكلميه يقولك أنا سألت عليه.. إيه فايدة السؤال؟"،
واستكمل: "انا بيتى مليان أوسمة أنا واخد أوسكار عالمي من كندا على إيد 16 سفير دولة في كندا تيجي النقابة تقولك إحنا بنخدم العضو دول ما بيخدموش حد.. كدب، ويحسسوكي إن هما الصح وإحنا اللي غلط".
واستطرد في القول: "الدواء اللي صرفتهولي المستشفى وأنا خارج فيه منهم ب100 جنيه التاني ب960 جنيه، هل أنا اقعد أستنى أقول دولة عربية تعالجنى ومليون دولة يعشقوا حمادة سلطان لو دريت بكدة هيبعتوا لي طيارة تاني يوم، أنا واحد كلمني من أمريكا لما عملت قلب مفتوح من 15 عامًا خلاني عيطت قالي أنا من عشاقك أؤمرني وأجيبلك طيارة شوف حب الناس، أنا مش عايز أضعف أنا قوي بإيماني".
كما كشف عن محافظ كفر الشيخ إبراهيم عجوة، رحمه الله، قام بعلاجه بعد مشاهدة حلقته مع برنامج "صباح الخير يا مصر"، وقال: "إبراهيم عجوة شافني في البرنامج، لاقيته باعت لي عربية تاني يوم وقالي أوعى تضعف أنت حقك عالبلد كلها تقف معاك في محنتك، ودفع لى عملية عيني 10 آلاف جنيه، لما وديت التقرير لنقابة الموسيقيين والتمثيل ولا صرفوا لي تعريفة، وبيزعلوا أن إحنا بنهاجمهم خلى حد فيهم يرد عليا لو أداني حقي، حسبي الله ونعم الوكيل وربنا يقويكم على فعل الخير مش فعل الشر".
هكذا أنهى "صاروخ النكتة" كلماته ب"صاحبة السعادة" قبل أن تنتهي حياته، صباح اليوم، عن عمر ناهز ال73 عامًا، بمستشفى "الجلاء" بعد صراع مع المرض.