ثواب لله

مَا تاخدى ثواب
ثواب لله
ليه مش عايزة
تحبى ف يوُم
ولو ب حساب
تعيشى حياة
بدل ما تروحى تستلفى
شوية حُب مش ولابد
عشان مَغشوش
بِطعم فُراق..
بقولك إيه؟ ما تعترفى
بدل ما تروحى تختلفى
مع العُشاق..
وتدارى ورى الأبواب
وتبنى خيال واحد كداب
تعيشى بنُص روح تايهة
وقلب فقير من الأشواق
يا عينى خلاص بقى مصدى
ومش لاقى غرام يلقاه
وقادرة تقولى مين قدى
وبرضُه بتلعنى الأسباب
ودى المُعاناة..
بقولك إيه؟ من الآخر
ما تاخدى ثواب
ثواب لله..
ولو بالكدب علشانى
مايمكن أموت وما تشوفنيش
وتفضلى برضُه وَحشانى
تتمنى ولو لحظة
تشوفينى..
وارجع اعيش
لكن هتفيد ب إيه الحُرقة
ونار الفُرقة من يوُمها
ما بتسبنيش..
دموعك قد إيه فارقة؟
ومش عايزك تجاوبينى
ما تقتلنيش..
وواجهينى عشان أعرف
أشوف إيه اللى جواكى
بدل ما أفضل عايش أوهام
وتبقى حياتى قتلاكى
مُجرد بس شبه كلام
وحصالة غرام قلبى
بقت مليانة من غُلبى
ومن إحساسهَا وجعاكى
ومن جوفها بقت خاوية
ومن خوفها لتنسى
وهىّ فاكراكى..
سؤال محتاج يكونلُه جواب
ورقتك عايزة ليه تنقّص
ده من جامع على كنيسة
بلف عشان غرام يتحس
قولت لشيخ ما تدعيلى
وصلالى أبونا القس
وده لإنك ف ألف كتاب
بخاف ع الورق ليطير
ورقتك ليها باب ورا باب
معايا لكنى ما بشوفهاش
سألت الناس عليكى كتير
وورتهُم صُحف قلبك
قالولى أكيد مانعرفهاش
ودَلّونى على السرداب
نزلت سمعت صوت واحدة
لَقيت صورة وعليها تراب
ومكتوب إنك الواحدة
اللى اختارت الوحدة
اللى قالتها مين قادر
يعيش من غيرى
وأنا عايشاه
بقولك إيه؟ من الآخر
ما تاخدى ثواب
ثواب لله..