يا بخت الأسبان بيك يا حرامي!

يوميات مواطن مفروس

والله وعملوها الأسبان ولاد الأبالسة وطلعوا أصيع من الراجل بتاع عاوز عشر رجالة يكتفوني، دول بيصارعوا تيران يا عم الحاج مش هايقدروا يصارعوا حرامي؟! فبعد أن عكموا النصاب العالمي حسين سالم من قفاه، والذي كان الدراع اليمين والشمال والمخ والعضلات للحرامي الكبير بتاع شيلني وأشيلك.. ما أنا برضه فرحتلك، وخلي عند أهلك دم، وراعيني قيراط.. أراعيك قيراطين، قرروا أن يقلبوا الراجل، ويطلعوا منه بقرشين حلوين يفكوا زنقتهم، خصوصا أنها فلوس حرام، يعني عبي علي قدر ما تقدر، وبعدين بقي ربنا يفرجها.. ويشوفوا إذا كانوا يسلموه لمصر، بس تدفع الفدية، ولا يخلوه متلقح عندهم في الحفظ والصون، ويجيبوا العيال الصيع بتوعهم يلاعبوه البرغوتة لحد ما ياخدوا هدومه وساعتها بقي.. البلد اللي عوزاه.. بالسلامة.. وفوقه بوسة كمان.
عملوها الأسبان ولاد العفريتة، خصوصا بعد ما دخلوا الفيللا وشافوا الدولارات أكوام أكوام ، والشيطان لعب في دماغهم، والشيطان شاطر يا أخوانا حقيقي مش أشطر من الشيطان اللي عندنا.. ولسه راقد.. لا عاوز يرحل.. ولا عزرائيل طايق يشوف خلقته، بس أهه شاطر والسلام وضحك علي أخوانا الأسبان، وقالهم.. ده رزق وربنا باعته.. فقرروا تجميد 59 مليون دولار، بالصلاة علي النبي، مش طمع ولا حاجة، بس عشان الراجل ده حرامي وجايز مستلف قرشين من أي واحد أسباني ومش عاوز يدفعهم أو بدل ما يخسرهم في القمار أو حد يضحك عليه ويقوله،، ما تيجي نعمل مشروع مصارعة الحمير وننافس الأسبان، وياخذ اللي وراه واللي قدامه.
ثم اكتشف الأسبان اللبط، أنه هايقعد في السجن متكيف ويطفح ببلاش، يعني ها يقف عليهم بخسارة قالك.. ما نفرج عنه وناخد القرشين اللي كان مخبيهم في الشراب، وبعد كده يروح في أي داهية، إن شاء الله يروح لأخواته الإسرائيليين يبني معاهم مستوطنات، وفعلا.. أفرجوا عنه بكفالة 27 مليون يورو، وهي أكبر كفالة في تاريخ أسبانيا من أيام الولية إيزابيلا، وحتي الآن، ويا بخت الأسبان بيك يا عم حسين،