يوميات شاب "فاضى" من ضحايا تامر حسني وعمرو مصطفي

لا أنكر أنني مازلت أستمع إلىهم "عمرو دياب وتامر حسني وعمرو مصطفي ومحمد حماقي وحمادة هلال وهشام عباس.. وغيرهم".. لكن هذا لأنهم ورايا ورايا..كلما ذهبت إلى مكان وجدتهم يغنون "الكافية، المطعم، القهوة، الميكروباص، التليفزيون".. وفي النهاية أجد نفسي غصب عني والله أنصت إلى مايقولون
"شهداء 25 يناير ماتوا في أحداث يناير": والله أنا فاجأتنى الأغننية دى وفارقه معايا ومع كل المصريين..كم أنت كبير ياحماده ومذاكر تاريخ جامد جداً، وفي النهايه عايز أقول لكل مصري أضف إلي معلوماتك أن شهداء 25 يناير ماتوا في أحداث يناير.!
"دنيتي اتغيرت من يوم ماشوفت عينيك أنا": حماقي بجد أنت حد كويس بس اتغيرت إزاي؟ بقيت بتشرب كابتشينو من غير سكر يعنى ولابطلت المصاصة وبقيت بتشرب حليب رايب؟ حماقي بجد تيك كير يابيبى.
"لمستك نسيت الحياة وانت اللي بحلم اعيش يوم معاه": ياخساره ياعمورة ملحقتش.. أصل أنت لما لمسته الفولت كان عالي قوي وفعلا لازم تنسي الحياة، مع إنك صرفت علي شعرك كتير عشان ميقعش أكتر من كده.
"مشيت ورا إحساسي": ليه ياروبي كده كان لازم تبيعي العجله كان زمانك راكباها بدل المشي..ودي كانت وش السعد عليكي طلعتى مش أصيلة خالص"
"بتمون ع بحكي انا": إليسا أنا بحبك بس هو عنده حق أنت رغايه قوي وهو من حقه يمون..ع مابتحكي بصي حاولي تغيري من نفسك شوية.. يعني ممكن تلبسي حاجة غير الفساتين..جلابية مثلاً"
"علم قلبي الغرام": بص ياعمورة أنا عارف إنك تعبت قوي في تربيه شعرك عشان الكليب ده بس ده مش مقياس..نصيحه اهتم بتربية الأولاد أفضل.
"اغيب اغيب واسأل عليه": السؤال مش كفايه لازم تحضر عشان بتتكتب غياب.
"قربي ليا خدي عيني": علي أساس إنك فاتح مسمط.. بص يا أسامه أو سامو ورغم أنى مش عارف أنت مش حابب أسمك ليه..حاول تسترجل وتشرب بريل.
"في حاجات بتتحس وماتتقلش": نانسي حبيبتي لو عندك ورقه وقلم ممكن تكتبي اللي أنت حاساه طالما عندك مشكله في الكلام.. وبقولك والنبى هو الكشف عند جوزك بكام؟
"أنا مش عارفني": طب إذا كنت أنت مش عارف نفسك مين هيعرفك؟ بص يا عبد الباسط روح اشتري مراية أو روح لشعبان عبد الرحيم هو هيعرفك.
"أجمل نساء الدنيا جوه عيونك أنت": لا ياصابر أنا عارف إنك رباعي وكبير.. بس ما تبالغش في عيون البنت هتستوعب الستات الجميلة دي كلها أزاي.
"لو يعني بايع طب ياللي بايع خد وأنت ماشي كل اللي يفكرني بيك": بص يابهاء شعرك ناعم بس فكك من الشنب.. وبعدين عاجبني إنك اديتها كل حاجه من غير مشاكل..أعتقد عشان أنت كده كده ماضي علي قايمة طويلة وعارف إنك هتديلها كل حاجه غصب عنك.!
"هوصلك حتي لو عارف إنى ممكن أموت": تامر أنت هتحوّر؟ ده أنت هربت من الجيش..حتي حلمي لما حب ينفذ كلامك راح ل"نور" العمارة ونط من فوق بطريقة عجيبه بس هنعمل إيه المخرج عايز كده.. ونصيحتى خليك في شعر صدرك.
"كام عام ومواسم عدو وشجر الليمون دبلان علي أرضه" : طب ليه كده يامنير سايبه لحد مايدبل..مش كنا استفدنا بيه وعملناه ليموناده للأغلبية الصامته اللي محروق دمها بعد الثورة..أعتقد إنك بكده ساهمت في انهيار جزء من الإقتصاد القومى.
"هتقولي أمشي مش همشي هتجبلي حد يقولي لمشي ما بمشييش": أما أنت خنيق قوى.. لعلمك هي لو جبتلك حد هيحط عليك..بس هي مش زيك..نصيحه أخبطيه بالعربيه.
"لا تنحني مثل البشر": يعني ياعم وديع بتشتري كل حاجه شكك وعايزها ترفع رأسها بين الناس إزاي..نصيحه وفر فلوس برانيتك وهتعيش كويس.
"هو ده عيبه نفسي الاقي علاج لحالته فين وانا أجيبه" :روح العزبي وشوف كمان حاجه لشعرك عشان في آخر أيامه ولا هتلجأ للبروكة وهتصاحب عزت أبو عوف وسمير غانم.
"أتحدي العالم كله وأنا وياك": علي أساس إنك عادل أمام في أحلام الفتي الطائر.
"ما بتعلمش بغيره القلب ما بيحلمش": نصيحه تسيبي "طارق لطفي" يسافر عشان يكون نفسه في كليب شنطه سفر.