تعليقا على إغلاق المحلات في العاشرة.. مستخدمو"تويتر": ده الشعب كان بينزل يتفرج على حظر التجول

لم يمر قرار الحكومة المصرية بإغلاق المحال التجارية في تمام العاشرة مساء من دون انتقاد وتعليق نشطاء موقع التدوينات القصيرة "تويتر"، فتحت الرابط التتبعي (هاشتاج) #غلق_المحلات والمحلات_هتقفل_بدري، تبادل النشطاء التعليقات.
وبشكل ساخر كتبت شيري حمادة تقول: "هما حددوا ميعاد غلق المحلات 10 مساء وماحددوش يفتحوا امتى. اقفلوا 10 وافتحوا تاني 10.30. أهو نبقى راضينا الحكومة وراضينا مزاج الشعب"، وكتب آخر: "على فكرة أصحاب المحلات قرروا غلق محلاتهم الساعة العاشره، بس غلاسة بغلاسة هيسيبوا كل الأنوار مفتوحة"، فيما كتب أحد النشطاء: "عايزين يطبقوا قرار غلق المحلات الساعة 10 على شعب كان بينزل يتفرج على حظر التجول".
ورأت نهاد أن هذا القرار يمثل "عملية اغتيال لمرسي"، وعلق إبراهيم حول قرار الوزارة بالتأجيل لأسبوع آخر لحين الانتهاء من اللائحة التنفيذية: "تم تأجيل القرار لحين كتابة اللائحة التنفيذية.. يعني كانوا هينفذِّوه من غير لائحة تنفيذية؟ طويب".
وكان لباهو رأيا آخر، حيث أشار إلى أنه من الصعب تنفيذ القرار على كافة المحال، فكتب: "مستحيل يتنفذ في كل محل في كل شارع وحارة في مصر، بس القرار حيخلي رقبة صاحب أي محل في إيد الداخلية. القرار ده عمليا بيعزز الداخلية"، بينما عابت سلمى على متخذي القرار، فكتبت: "عيب عليكي يا حكومة مش عارفة تدرسي قرار وتأخدي فيه خطوة حاسمة.. كل مستشارينك دول مافيهومش حد رشيد بيفهم؟".
وأكد محمود أن القرار فاشل، معلقا: "المحلات هتقفل بدري عشان الحكومة عندها إصرار على الفشل، عشان الشعب يسهر في الكباريهات ويشرب خمرة براحته.. يفرفش على نفسه مش ليل نهار شغل".
وبطريقة ساخرة علق محمود نجار: "طب بالنسبة لبنت أخو عفاف شعيب، هتاكل بيتزا منين؟"، فيما قال أحمد راغب: "بكره يطلع قانون على أن يتم تعديل أوقات العمل لتبدأ مباشرة بعد صلاة الفجر".
ولطبيعة الشعب المصري الذي قام بالتقاط الصور بجانب الدبابات، قالت هبة ناجي: "وطبعا الشعب المصري بيحب الإثارة. هيتصور قدام المحلات وهي مقفولة وينزلوا صورهم على الفيس وتويتر. شعب ظيَّاط بطبعه"، واتفق معها ناجي: "واحنا ننزل نتفرج عليها لما تقفل".
وبنبرة أسى قالت يوكا: "يعني مش هيبقى تحرش بس، ده تحرش واغتصاب وتثبيت وسرقة. لا النهضة حلوة مافيش كلام"، فيما قال وليد منصور: "إيه وجه الاستفادة من الموضوع؟ الصيف خلص كمان يعني مش موضوع كهرباء خالص بقى".
وعلى طريقة جمال مبارك، علَّق محمد عاطف: "كنت هندهك يا حسين.. بس الموضوع المرة دي أكبر منك".