بعد إغلاق "الفراعين".. باسم يوسف: أرفض إغلاق أي قنوات أو صحف تحت أي عذر

أعلن الإعلامي باسم يوسف أنه ضد إغلاق قنوات أو صحف تحت أي عذر، وطالب عبر تغريدة جديدة له على توتير "حقق مع اللي تحقق معاه، ارفع قضية، لكن لو فرحت في حد النهاردة عشان مش عاجبك بكرة يجي الدور عليك".
مضيفا "مبارك كان بيقفل قنوات وصحف وكله بالقانون. احنا ما قمناش بثورة عشان نقفل على الناس تاني حتى لو كلامهم مدلس. الصحف الصفرا موجودة في كل الدنيا".
وأكمل حديثه "القنوات الدينية والقاهرة اليوم اتقفلوا وقت مبارك بالقانون. بنعيد نفس الغلط. حول الشخص للتحقيق بس تقفل قناة غلط".
وكتب بأسلوبه الساخر "والقضاء بقى حلو دلوقتي عشان قفل قناة مش عجبانا؟ مش ده القضاء الفاسد المسيس بتاع مبارك اللي حل المجلس؟ بقى فلة دلوقتي؟؛ لو قفلت قناة بحجة أنها تثير الفتنة ممكن تقفل أي قناة بعد كده بنفس الحجة، أون تي في، دريم، الحياة سي بي سي. لكن القنوات الدينية مش فتنة خالص".
واصل يوسف انتقاده لقرار إغلاق قناة الفراعين والحديث عن صاحبها توفيق عكاشة، فكتب "نيجي على آخر الزمن نعمل من عكاشة بطل وشهيد؟ اهي دي المسخرة بعينها. الحل مش قفل القنوات. حقق وحاسب على أصول المهنية. القفل غلط، يبقى نقفل جريدة الحرية والعدالة لما دلست على المتظاهرين ونقفل الفجر وروزاليوسف وقناة الناس والموجز. القفل غلط".
وأخيرا ختم تغريدته "اللي فرحوا بقفل القنوات المحرضة بكرة يقفلوا أكونتات تويتر وفيس بوك ويقطعوا النت علشان الفتنة. أصل القرار حلو طالما بعيد عن... ولا بلاش".