م الآخر| "دمهم في رقبة مين؟!"

فعلا دم اللي راحوا في أحداث مباراة الزمالك وأنبي في رقبة مين واللي قبلهم برده واللي كان عددهم 72 إنسان دمهم في رقبة مين ، اللي لغاية دلوقتي حقهم لسه ما جاش اللي لغاية دلوقتي المحكمة بتقبل طعون وطعون وطعون وده مش تعليق علي أحكام القضاء ولا شيء لا سمح الله بس العدالة الناجزة يا حكومة العدالة الناجزة اللي بطهر الشعوب واللي بتقتل الأمراض زي مرض الفقر والحقد والغل والكراهية ومرض الإرهاب.
لو الحكومة والمجتمع أمنيتهم أنه مش يبقي فيه إرهاب خالي العدالة تبقي ناجزة محتاجين يبقي فيه سلام خاللي اللي من دوره يحمي الناس كان قام بحماية أرواح الناس علشان مش يموت 22 إنسان في مباراة كورة قدم . يعني أيه أقدم وأعرق بلد في التاريخ يموت فيها 22 ومن قبلهم 72 إنسان في مباراة كرة قدم يعني أيه.
أنا اللي أعرفه وأفهمه البلد اللي مش تقدر تحمي شباب من نفسهم حتي في مباراة كورة قدم ولا تقدر تحمي محطة مترو زي محطة التحرير وتفتحها وتبطل تعطل مصالح الناس تبقي بلد فاشلة والأفضل أننا نقفلها ونقعد ونشوف حد غيرنا يعرف يحميها ويظبطها ونسيبها ليه.
أما بالنسبة لمين السبب في قتل الشباب أنا ما أقدرش أتهم الأخوان لوحدهم في قتل الشباب ولكن ليهم مصلحه أه ليهم مصلحه ولكن لما يبقي متواجد في كتير من صفحات التواصل الإجتماعي أن رئيس نادي الزمالك وجه الجماهير بأن الدخول سيكون بدون تذاكر يبقي هوا كمان مشترك ولما الأمن يسمح للناس بالتدافع المميت ده يبقي مشترك ولما لاعبي الكورة يكملوا المباراة وكأن اللي بيموتوا بره دول حفنة من الحسالة وكأنهم مش بشر يبقي مشتركين ولما بعض الأعلاميين يقولوا في برامج التوك شو أن سبب تدافع الشباب للدخول وموتهم الإرهاب والإخوان وأن ذلك بنية قصد إفساد زيارة الرئيس الروسي وكذا إفساد المؤتمر الاقتصادي يبقي هما كمان مشتركين ولكل منهم مشاركته فهناك مشترك مجرم ومشترك معتوه ومشترك قاصد ومشترك مجنون ولكل منهم موضوعه اللي يختاره بمزاجه ولكن كلهم مشتركون.
فيا أهل الأرض يا أهل الدين إن الله حرم قتل النفس بكل الطرق والأشكال فأرجوكم كلاً يقوم بدوره بحماية الأنسان لآنه إنسان فلو كان هناك مخطط لقتل الشباب تحت إدعاء التزاحم فلنقم بكل الأشكال بمنع موتهم وإيذائهم لأنفسهم وهناك آلاف الوسائل لمنع هذه المجزرة أن تحدث أرجوكم تعاملوا مع مثل هذه المواقف بحزم وبحكمة وبسرعه وبعدل وتذكروا أن كل من يموت هو إنسان وأنكم سوف تسألون أمام المولي عز وجل فلا يغرنكم مناصبكم أو حصاناتكم فأمام المولي لا يحصن ولا يعظم أحد إلا بأمر الله وبعمله فقط ورحم الله كل إنسان أستشهد علي أرض هذا الوطن.