إلى روح شاعر الشعب، شاعر الغلابة، شاعر تكدير الأمن العام، شاعر الثورة، الشاعر البندقية، الفاجومي.. أحمد فؤاد نجم، في ذكرى رحيله. حوارية تتضمن مقاطع من أشعاره: ونجم مات.. ونجم مات.. آخر خبر في الراديوهات وفي الحواري والشوارع وع القهاوي وع البارات مات المناضل المثال ياميت ندامة ع الرجال جسّد نضاله بثورته ومات من سكات ونجم مااااااات واتمد حبل الدردشة والتعليقات: - دا كان خمورجي وأبصر إيه!! وطول لسانه أد إيه!! .. أبدا يا بيه دا آخره كان نفسين شيشه لجل ف حياته الدرويشة يعيش وينصب ع العيشة علشان يقول من قلبه لينا كلمتين: "كل عين تعشق حليوة وانتي حلوة ف كل عين يا حبيبتي قلبي عاشق واسمحيلى بكلمتين شابه يام الشعر ليلي والجبين شق النهار والعيون بحرين أماني والخدود عسل ونار واللوالي ف ابتسامتك يحكوا أسرار المحار ياللي ساكنة القصر عالي إمتى يهنالي المزار كلميني يا صبية طال عليا الانتظار كلمتين يا مصر يمكن هما آخر كلمتين حد ضامن يمشي آمن أو مآمن يمشي فين؟!" ..وكان فاجومي تشبعه الجبنة القريش صوته يوصل.. من حلايب للعريش: "يعيش أهل بلدي.. وبينهم مفيش تعارف يخلي التحالف يعيش تعيش كل طايفة.. من التانية خايفة وتنزل ستاير.. بداير وشيش لكن في الموالد.. يا شعبي يا خالد بنتلم صحبة.. ونهتف: يعيش!!". ..وكاااان مطرقع .. كان جنان وأما يسخن.. يجلدك بمتين لسان: "الجدع جدع .. والجبان جبان بينا يا جدع.. ننزل الميدان والميدان بعيد.. عن جوف المدينة يا تار الشهيد.. دير ياسين وسينا بحري والصعيد.. إحنا اهو أدينا أصلب م الحديد.. في الشدة تلاقينا". - بس دا كان شغلته صنف الحريم!! شكله كان.. عايش عشان.. "شوقا ً يهيم"!!! كان صحيح مغرم.. وكان سريع الاشتعال زي ما – عن نفسه – قال!!! بس كله.. كله كله.. بالحلال يعدل مزاجه.. يتبسط ويقول لنا الشعر اللي هوه في عيونهم والوطن.. زي الزلال: "عطشان يا صبايا .. وأنا عاشق ع السبيل عطشان والميه ف بلدي.. على عكس ما يجري النيل والنخل العالي مطاطي.. والجذع الواطي ذليل والريح العكس كابس.. والريح العاطي بخيل!!". وأما الفتنة تتفرفط.. من دقن غراب البين يرفع كرباج الكلمة.. يضرب بحروفه الزين: "دا شيعة وإحنا سنة.. دا فين ومصر فين عايزين يدخلونا.. نظام ودنك منين!! وناس تقول شيوعي.. وعامل نفسه شيعي عشان خايفين طبيعي.. ليبقوا ثورتين يا أسيادنا اللصوص.. قرينا ف النصوص لو الإنسان يلوص.. يغوروا الفرقتين خلاصة الكلام: يزيد؟!! ولا الحسين؟!!". وأما يفلسف في الكلام.. يشفي العليل ما يضر والدم لو ف العدا.. منين يا ناس ها يسر: "مر الكلام.. زي الحسام.. يقطع مكان ما يمر أما المديح.. سهل ومريح.. يخدع صحيح ويغر والكلمة دين.. من غير إيدين.. بس الوفا ع الحر!!". وهجومي كان.. فى المفاصل ما يهادنشي وبالأصول كان بيحلم يوم بثورة.. عاش وشافها اتنين عُدول: "إن قلت كلمة لم تخاف.. وإن خفت كلمة لم تقول كلام تقيل.. على الخفاف.. والفهم لأصحاب العقول ما فهمتنيش.. شد اللحاف.. ونام وسيب النوم يطول وبوس إيديك.. وكلها حاف.. والصبر برسيم العجول تاكل شمال.. تشيل كتاف.. يعرض قفاك.. تصبر تنول ولما تفرج بالكفاف.. تهيص.. وتملا المخلة فول!!". بس دا ما دخلش جامع ع القهاوي.. شرقه غربه!! لامم الحرافيش عليه والأغاني وشيخ إمامه.. هما دربه!! صوت رسولنا يقول ويهدي مش ها ندخل جوه قلبه ده حسابه عند ربه أما إحنا.. من كلامه.. راح نحاسبه: "ما تصح النوم وتفوّق.. وتشوف بتكلم مين! الشعب بخير يا مرحرح.. والناس كلك عارفين مين اللي خان بهية.. ومين قتل ياسين ومين بهدل بلدنا.. ومين ومين ومين ويا مصر.. يا أول صورة.. ف عيون المولودين ويا مصر.. يا آخر صورة.. ف عيون الميتين يابلدنا يا بكره ولادنا.. يام الدنيا والدين يام الولدات المجدع .. والبنتات الطعمين يحرم اسمك علينا.. ونعيش متغربين لو سبنا الذل يدوسك.. أو عشنا مغلوبين ويا سينا أكيد جايينك.. ناخد بتار ياسين!!". وان سبته يعيش في القهوة وف عمره ما فات على قصر ويعز الورد البلدي وف سجنه يغني لمصر: "صباح الخير على الورد اللي فتح.. في جناين مصر صباح العندليب يشدي.. بألحان السبوع يا مصر صباح الداية واللفة.. ورش الملح ف الزفة صباح يطلع بأعلامنا.. من القلعه لباب النصر". وأما ولاد الكلب الجبنا.. يبنوا لمصر بلدنا كمين تلقى كلامه يهز العالم.. وبيكشفهم دنيا ودين يعزف أحلى كلام لولاد.. يحموا حدودنا أسود واقفين: "دولا مين ودولا مين.. دولا عساكر مصريين دولا مين ودولا مين.. دولا ولاد الفلاحين دولا الورد الحلو البلدي.. يصحى يفتّح.. تصحي يا بلدى دولا خلاصة مصر يا ولدي.. دولا عيون المصريين دولا القوة ودولا العز.. دولا شاربين من أطهر بز هز يا دفعة هلالك هز.. واحنا وراك ملايين جايين دولا يا سينا ولاد الشهدا.. دولا التار لا ينام ولا يهدا خلي ترابك يسكن يهدا.. ويضم الشهدا الجايين دولا مين ودولا مين.. دولا عساكر مصريين". وكان شِديد.. ما تهمهوش كل المصايب ويحب بلده وعزوته.. حاضر وغايب: "يا اسكندرية.. بحرك عجايب ياريت ينوبني .. م الحب جانب تحدفني موجة.. على صِدر موجة والبحر هوجة.. والصيد مطايب أغسل هدومي.. وأنشر همومي على شمس طالعة.. وأنا فيها دايب ..يا اسكندرية.. بحرك عجايب". وكان عروبي وقومجي.. وبكلمته يشعل دماكو يهتف ويصرخ ياااا عرب.. ليه الأمم مستضعفاكو: "يا فلسطينية.. والبندقاني رماكوا بالصهيونية.. تقتل حَمامكوا ف حِماكوا يا فلسطينية.. وأنا بدي أسافر حداكوا ناري ف إديه.. وإديه تنزل معاكوا على راس الحية.. وتموت شريعة هولاكو.. تموت شريعة.. هولاكو". - بس كان غلاط.. وبيكشف المستور وكان يسيب السكك.. وينط من ع السور ...وكان يقول الحِكم.. وابعد بعيد يا غرور وكان في صف الغلابة.. واقف عنيد وجسور: "دور يا كلام على كيفك دور خلي بلدنا تعوم في النور ترمي الكلمة ف بطن الضلمة تحبل سلمى وتولد نور يكشف عيبنا.. ويلهلبنا لسعة ف لسعة نهب نثور". ..واسمع كلامه المعتبر.. باللحن والصوت والحنين يكشفنا ويهز الحجر.. من شيخ إمام المبصرين: "يا بهيه وخبرينا.. ع اللي جتل ياسين في الصحرا والمدينة.. اليوم دا ومن سنين ناس تمشي وناس تجينا.. واحنا متبعترين ولا صاري في السفينة.. ولا مربط للهجين والدنيا بتجري بينا.. واحنا متوخرين يا بهية ولملمينا.. نطرح مليون ياسين يا بهية.. لملمينا.. نطرح مليون ياسين". ... ورغم الصيت والشهرة العالية.. عمره ما فكر يعمل بيه وكان بيدغدغ ف الموال.. لجل يقول أجمل إفيه: " يا ليل يا عين ما اعرفش أكدب.. طب وأكدب ليه عدم المؤاخذه لانا بكتب.. ولا أبصر إيه لكني شايف بعنيه.. يا فلاحين يا صنايعية بر الأمان.. بان.. والمركب.. راح ترسى عليه وأنا حاكدب ليه؟". ...واسمع كلامه اللي هبط.. واللي سلك فوق كل شعر.. بجناحين.. زي المَلك: "دار الفلك في مغزلك.. طول السنين.. ما أمهلك يا ناسج الروح في الحياة.. الحب لك.. والخلد لك إنت الأزل.. وانت الأبد.. والهالك اللي يجهلك وانت الجريح.. تيجى الأطبا وتسألك يا شعب يا نبض الوجود.. يا شعب ياروح الخلود ما أعجبك.. ما أنجبك.. ما أجملك.. ما أنبلك!! الحكم لك.. والملك لك.. الملك لك.. الملك لك". ... ولما الدنيا غامت.. والضلمة جاتنا العصر رفع رايات للأمل.. كانت دليل للنصر: "هزي هلالك هاتي النصر.. كوني يا مصر وعيشي يا مصر مدي إيديكي وطولي العصر.. اصحي يا مصر وكوني يا مصر اصحى يا عامل مصر يا مجدع.. واصحى يا زارع مصر الخضرة واصحى يا جندى يا تار الشهدا.. عمي وخالك.. أختي وأخوك لجل ما تهدى وتارك يهدا.. فرّغ نارك ف اللي خانوك يابن الشعب يا حامي الشعب.. إنت أملنا ف يوم الصعب حرر مصر وطهر مصر.. اصحي وكوني وعيشي يا مصر". تشريفة (1) "مصر يامه يا بهية يام طرحة وجلابية الزمن شاب وانتي شابة هوه رايح وانتي جاية". تشريفة (2) "غرامي في الحروب يسبق سلامي وأملي في الشعوب يخلق غنايا وعشقي للكلام سابق سكوتي وكرهي للسكوت جالب شقايا". تشريفة (3) ..ونجم مات.. سيدنا الحسين ومن مقامك.. طار لفين؟! ..ونجم مات يا دموع حمدين أروي الأمل.. يطرح فدادين!! تشريفة (4) ونجم مات.. يا شيخ إمام جالك على ترب الإمام!! أمانة قابله بعووود.. شجي واعزف له صوت "غنوة سلام" اعزف له صوت.. غنوة سلام.
