حسن شاكوش: أبويا كان بيرفض يديني 2 جنيه عشان ألعب كرة.. وكنت بتقي شره

كشف مغني المهرجانات حسن شاكوش، عن علاقته بوالده، مؤكدا أنه عندما كان يطلب منه جنيهين من أجل لعب كرة القدم يرفض: «كنت بروح له أنا و9 من أصحابي عشان كل واحد يدفع 2 جنيه، وبالتالي يكون معانا 20 جنيه حق الساعة التأجير بتوع الساعة اللي هنلعبها، كان يرفض ويزعق ويعلي صوته عليا».
وأضاف «شاكوش»، خلال حواره في برنامج «لحظات جريئة»، الذي يُعرض على شاشة «القاهرة والناس»، مع الإعلامي أحمد سالم: «أبويا كان يقعد يقولي أنا مش معايا فلوس ومتتكلمش تاني، أنا مكنتش برد عليه طبعا، وبقول عاوز أتقي شره وأخرج من قدامه أهم حاجة، لما أنزل تحت ألاقيه يبص من البلكونة ويحدفلي 5 جنيه».
فيما تحدث الإذاعي مفيد فوزي، عن علاقته بوالده، متذكرا موقف له عندما ضاعت فردة من حذائة الجديد: «أبويا ربطني في السرير بعد ما نزلت الترعة في بنى سويف، وأصحابي عملوا فيا مقلب وواحد أخذ فردة من حذائي الجديد، أبويا بقى ربطني وقتها في السرير وضربني، يعني اتربيت يعني».
بينما تحدثت الكاتبة ياسمين الخطيب، عن أن والدها كان دائم التفاخر بها من الطفولة: «كان يقولي وهو قاعد وسط صحابه اتكلمي معانا وخليكي في مجلس الرجال عشان يكون عندي شخصية، ويقولي وريلهم رسمتي ايه أو كتبتي إيه حتى ولو حاجة تافهة، الله يرحمه لو عايش دلوقتي كان هيسعد بأي نجاح أحققه».
في السياق ذاته، قالت الفنانة سماح أنور، إنها لم تستحمل حتى الآن فقدان والديها بشكل مفاجئ: «أنا مستحملتش لحد الآن، مستنيه لما أروح نتقابل تاني، أنا مليش حد بعدهم، أنا بحس أني افتقدت نفسي، كل واحد خد مني حته مرجعلتيش أبدًا، وحشتني أوي الحاجات اللي اتخدت مني، مش هما بس».
بينما قالت الإعلامية هبة الأباصيري، إن والدتها كانت ربة منزل، وكانت تعد عمود البيت بالنسبة لها ووالوالدها: «هو أه كان بيشتغل بس هو البيت قايم على كتاف الست دي، لما توفت الله يرحمها ماما بقيت أحس أن أبويا بقى ابني، عندي تجاهه مشاعر الأمومة».