هتتكلف 25 ألف جنيه: «محمد» محتاج جراحة عشان يضحك من «قلبه»

حياته تحولت إلى ظلام حالك، فابنه الذى لم يتجاوز الخامسة يعانى من ثقب فى القلب بين الأذنين حجمه 2 سنتيمتر.. حالة الطفل «محمد» الحرجة التى تحتاج إلى عملية قلب مفتوح تكلفتها 25 ألف جنيه حولت حياة الأب «السيد أحمد على» إلى جحيم: «ده العيل اللى طلعت بيه من الدنيا، بعد 5 سنين لف على الدكاترة أنا ومراتى عشان نخلف». طرق الأب الملكوم جميع الأبواب، زار عدداً من المستشفيات فى القاهرة وسوهاج، وأكد له أطباء مركز القلب فى سوهاج أن إمكانيات المركز محدودة لعمل جراحة بالقلب، وأن ابنه يحتاج إلى جرّاح قلب كبير مثل الدكتور مجدى يعقوب ليقوم بالجراحة، فى الوقت الذى لا يملك فيه الأب ما يفعله لينقذ حياة ابنه. «أنا مش عايز فلوس، خدوا روحى بس ابنى يعيش، مش عارف أعمل إيه ولا أروح فين، نفسى حد يساعدنى أنقذ ابنى».. كلمات قالها الأب المكلوم، وأضاف: «مستعد أبيع اللى ورايا واللى قدامى وأكتب شيكات على نفسى، المهم ابنى يعيش ويقدر يلعب مع صحابه تانى».
يومياً يذهب الأب من مسكنه فى مدينة جرجا إلى مقر عمله بسوهاج، يحمل تقارير وأشعة ابنه الصغير عسى أن يجد من يساعده على إرسالها إلى مستشفى ليقوم بعلاج ابنه: «رحت جميع مستشفيات سوهاج ونزلت القاهرة أكتر من مرة والكل بيأكد إن العملية هتكلف أكتر من 25 ألف جنيه».
يتمنى «السيد» أن يعالج ابنه على نفقة الدولة وتعود ابتسامته التى اختفت بفعل الألم الذى يشعر به فى صدره وعدم قدرته على التنفس إلا بصعوبة.