«جهاد».. السادس مكرر أدبى: «نفسى أحقق حلمى وأغير بلدى»

«بتولى السيسى الرئاسة أعطانى الأمل فى بكرة وحسّسنى إنى ممكن أحقق حلمى، أنا نفسى أغير حاجة فى بلدى وده كان حيبقى صعب فى عهد الإخوان لنظرتهم للمرأة» بهذه الكلمات المقتضبة أعربت الطالبة جهاد إبراهيم السيد أحمد بمدرسة سانت جانت انتيد الراهبات الثانوية، والحاصلة على المركز السادس شعبة أدبى مكرر على مستوى الجمهورية.
تقول «جهاد» ل«الوطن»: أن أكون من أوائل الثانوية العامة ده كان هدفى فى بداية العام الدراسى، بس اللى حصل فى الامتحانات والغش الإلكترونى حسيت إنى ممكن ماكنش من الأوائل بس الحمد لله ربنا وفقنى وطلعت السادس مكرر»، مشيرة إلى أن السبب بعد ربنا بابا وماما والمدرسون وأصدقاؤها.
وتضيف: «رسالة لكل الناس اشتغل واعمل اللى عليك دلوقتى فيه أمل فى مصر، الرئيس قال اشتغلوا وإحنا مستعدين إننا نشتغل ونبنى مصر ونحقق تقدمها، دلوقتى أى حد هيحاول يصلح فى البلد حيلاقى اللى يسنده بعد تولى السيسى الرئاسة».
وتشير إلى أنها ستلتحق بكلية الألسن قسم يابانى لحبها الشديد وتعلقها بدولة اليابان وقدرتهم على بناء حضارة وتقدم وازدهار، قائلة: «أنا معجبة جداً بدولة اليابان ونفسى مصر تكون زيها فى يوم من الأيام وأحسن منها.. قريت فى حضارتها وتقدمها بعد ما انهارت والشعب وقف إيد واحدة وحقق التقدم واتعلمت اللغة اليابانية، ونفسى أدرسها أكثر علشان أعمل حاجة فى بلدى».
وتقول: «أنا نفسى أشوف مصر زى اليابان وإن شاء الله أنا ناوية أحقق حاجة وأشتغل من دلوقتى فى بلدى»..وعن لحظة الفرحة التى مرت عليها أثناء إبلاغها الخبر من قبل مكتب وزير التربية والتعليم، تقول والدتها: «لقينا مكتب الوزير بيكلمها ويقول لها مبروك إنتِ حصلتى على المركز السادس مكرر بشعبة الأدبى بمجموع 406، وبعدين كلمها الوزير وهنأها وكلمنى أنا كمان وقال لى مبروك لجهاد وبالتوفيق».