نازل ولّا متنازل

وده مش علشان اديتوا صوتكم لمرشح معين ولكن علشان نزلتوا وفيه منكم اللى سافر مسافات علشانقبل أى كلام لازم نضرب تعظيم سلام كبير لإخواتنا اللى برة.. إنتوا شرّفتونا ورفعتوا راسنا ورسمتوا أحلى فرحة على وش كل مصرى عايش فى مصر.. يقول رأيه.. بنضرب ليكم تعظيم سلام علشان وريتوا العالم كله إن المصريين بره وقت الجد هم جنود بيحموا الوطن. نرجع بقى للمصريين اللى جوه.. فيه ناس بتدعو المصريين فى الداخل لمقاطعة الانتخابات الرئاسية، والناس دى مش الإخوان بس، بالعكس فيه منهم ثوار وفلول.. من وجهة نظرى فأياً كان اللى بيدعو الشعب المصرى للمقاطعة هو شخص خبيث.. إنك تدعو للمقاطعة دى دعوة ظاهرها خبث وباطنها شر وأذى.. إنت بدعوتك دى بتسرق من المصريين حق قامت علشانه ثورتين مش ثورة واحدة.. إنت بتتعدى على حق المصريين فى أن يكون ليهم رأى ودور فى تقرير مصيرهم.. بتحوّل المصريين لشعب سلبى مالوش رأى ولا كلمة. بعد ثورة 25 يناير كنت باتناقش مع حد فى أن أحد أسباب قيام الثورة هو تزوير انتخابات مجلس الشعب وده صح طبعا لحد كبير.. لكن كانت وجهة نظرى إننا إحنا كمان شاركنا فى التزوير ده.. إحنا كمان كنا أحد أسباب التزوير ده.. هتقول لى إزاى؟!.. ببساطة «السلبية».. إحنا كنا سلبيين ماحدش كان بيفكر ينزل يعمل بطاقة انتخابية.. لو كنا كلنا اهتمينا وشاركنا كان ممكن نوقف التزوير ده.
وبعد تلات سنين مندهشة الحقيقة من الناس اللى بتطالب الناس إنهم يتنازلوا عن الحق فى تقرير مصيرهم ويرجعوا للسلبية مرة تانية. لو قررت تتنازل عن حقك فى إنك تقول رأيك فلازم تبقى عارف إنه مش هيبقى من حقك تعترض على الطريق اللى هنمشى فيه لأنك وقت الجد تنازلت عن حقك. التنازل عن حقك فى إنك تقول رأيك معناه إنك ضيعت دم الشهدا.. هو إنت فاكر إنك هترجع حق الشهدا سواء من الجيش أو الشرطة أو المواطنين العاديين بأنك تقتص من القتلة بس؟!.. لا، حضرتك فاهم غلط، حق الشهدا هيرجع لما نحافظ على كل حاجة ماتوا فى سبيلها.. وفيه ناس ماتت علشان حضرتك يكون ليك حق تنزل وتقول رأيك.. وانت جاى دلوقتى ببساطة تضيّع دمهم وتقاطع.
من فضلكم انزلوا.. انزلوا قولوا رأيكم.. اللى عايز ينتخب حمدين ينتخبه.. اللى عايز ينتخب السيسى ينتخبه.. اللى مش عاجبه لا ده ولا ده مش مشكلة انزل ابطل صوتك.. المهم إنك تنزل وتشارك.. المهم إنك تورى العالم كله إننا لينا رأى وإننا هننزل بالملايين نقول رأينا.
عدم نزولك معناه إنك بتتخلى مش بس عن حقك لأ، إنت كمان بتتخلى عن مصر.. مصر محتاجة لك تاخد بايديها محتاجة لك تسندها قدام العالم ما ينفعش تقعد تتفرج عليها وما تمدش إيدك وتساعدها.
كلنا لازم ننزل، كلنا لازم نحشد، لازم نعرف كل حد حوالينا أهمية إنه ينزل.. مش مهم هيختار إيه.. المهم إنه ينزل.
كل واحد فينا هينزل نزوله رصاصة فى قلب الإرهاب.. رصاصة فى قلب الخونة.. انزلوا يا مصريين قولوا إنكم مش خايفين، قولوا إنكم أقوى من كل الغدر والإرهاب.
لازم ننزل كلنا نقول رأينا أيا كان.. تابعونا واحشدوا معانا على الهاشتاج ده على تويتر والفيس بوك «#نازل ولا متنازل».