عواد

رميت العمر من ورا كتافك
كفرت بإله النما...
وخرجت من توبك
يا تسد شق الكف بالغربة
يا تسد شق الأرض بكفوفك
العتمة بتخبى الوشوش
والضى مكسور ع الحيطان
وقريبة ساعة غروبك
طالع فى نص الليل تدوّر عن وطن
طب كنت كِن فى عشك الآمن
كل الشجر فى الليل بيبقى أسود
فارجع......
وخبى الصبر فى جيوبك
- سامحينى.....
وكفايه عمرى اللى اتبدر ريح ع السكك
طعم المرار م الغربة ساكن فى القلوب
هيدوب مرار العمر طوالى....
ساعة ما زى زمان...
تضمينى بدراعينك
القلب عشمان بالوصال
دى الشمس كت تحمى قوى
فأمشى فى درا عينك
قلبك حنون....
مش برضو أم؟!
- م الأرض كانت أم
وهى اللى بيحل لها تحبل من ولادها
بدال ما بيخطى السرايب شوك عاقولى
هى اللى أولى بالوصال منى
وأنا ياما قلت فى عقل بالى بكره ترجع
لكن انت خيّبت الظنون
وقلت عدوا لى
- صدقينى الغربة حراقة
والقرش لو قصر... بيقصر الرقبة
كت العفاريت الزرق بتقيّل
وهو خيال مقاتة فى كل غيط
الشمس تاكل فى القفا...
ويموت جعان
يتهان بحجة الاعتراض
وهو اللى قضى العمر جنب الحيط
ما قدرتش أتحمل....
تدوس الخلق فوق قلبى بجنيه صدّى
نعيش العمر يوم واتنين وتتقضى
وخفت بأنى أبان جنبك شبح فاضى
وخفت بأنى أبات جنب اللى قلبى هواه
وأنا مطاطى
وذى المياه دنياكم....
بتجرى تملّى ع الواطى
شقيت هدومى من الغلا
ومن الوبا
ومن نوم الرجال فى الضل
سنين العمر تسرقنى
وبسرق منها كلمة آه
فقلت هروح أجيب زادك
وأصون سرك
بدل فضح الجتت فى الطل
- سر البيوت مابقاش مصان
أصل المساكن بشر
والضل مش ضل الحيطان
واللى انسرق م العمر مش قد اللى باقى
الفاس ما يقبلشى الضعيف
بيعض إيدك لو تلين
لازم تخلى الشمس فى عيونك
علشان تسابق الضل وتخطيه
وبإيه يفيد الدمع فى جفونك
دالملح لو كان م الجبين يزرع
والدمع لو خطى التراب....
يخصيه
غنوا البنات والغنوة تعديدة
«عواد باع أرضه....
ياولاد»
وصبحت سليوة بتسلى قعدتهم
طب لو نسيت أنا....
كيف ينسوا غنوتهم
- الريح لو فى اتجاه واحد
تلقى الشجر بيميل
ماعدلش عودى الفرح
ف إزاى هيخضر الورق والجدر ناشف
علمنى ضعفى الانحناء....
كان نفسى أموت زى الشجر واقف
كان قلبى يتلون كما فعل الجراد
بلون زرعك....
وسمار طينك
يشبه فى السمار عواد
عبيت سنين العمر فى المخلة
وقلت أرض الله لخلق الله
عواد مابعش الأرض....
هى اللى كت بايعاه