اعتذار يمكن يكون أخير

باعتذر عن كل شىء.... حتى عن نفسى....
عن خوفى.. وظروفى..
عن حبى وحروفى
.. عن اللقا.. والبعد... عن الحنان والعند.. عن نوة البحار.. والبرق والأمطار.. عن الخفى فيا... وعن المعلوم... وعنى لو ظالم.. وحتى لو مظلوم... وعن القمر اللى غاب.. والشمس لو قسيت..
وعن الشجر البخيل بالضل...
والفرح لما يقل..
والبرد والدفا.. وعن طول الطريق.
باعتذر عن أى شىء... وكل شىء
عن أمان البحر أو غدره...
عن مده أو جذره.. عن موجه لو عالى..وعن حلالى..
وف قلبى حادفن سؤالى.. ومش حالوم واعتب..
عن كل ما كتبت... وكل ما حاكتب..
عن كل حلم وهبتله روحى.. ولكل مين جرحته بجروحى..
وباقولها زى الشمس واضحة.. أنا مش برىء..
عن نظرة مستحية..
أو جريئة...
وحتى لو بريئة..
عن ظنى وشكوكى.. لو جرحك شوكى..
من وردتى الرقيقة.. عن كدب صدقتيه.. عن الحقيقة..
عن عمر ضيعتيه.. ولو دقيقة..
وعن حصى ضايق خطاكى فى الطريق..
باعتذر عن كل شىء.
اعتذر.. عن كل شك.. أو يقين...
عن وشوشات العاشقين..
وغنى الطيور الصبح ع الأشجار..
عن رقتى وعنفى.. عن حزنى أو فرحى.
وعن كلام اتقال.. وعن السكوت لو طال..
عن السيول والبرق.. عن كل غصة ف حلق.. وعن مظاهرة هتفت فيها.. عن اعتصامى.. أو عزوفى عن الطعام.
عن كفرى بالكلام..
وعن أيمانى بالمحال.. عن السراب والزيف..
عن الشتا والصيف..
عن ضلمة حاوطتنى..
وعن فجرى المضىء..
باعتذر عن كل شىء
باعتذر بالصمت عن صوتى..
وعن حياتى فيكى.. أو بيكى.. أو ليكى.. أو موتى..
عن الغيوم والبكا.. والضغط لو عالى.. عن حق بيطاطى...
عن الجفاف والغيث.. وصفحتى ع الفيس.. والروح إذا وسعت..
والقلب لما يضيق..
باعتذر عن كل شىء
أنا باعتذر للقدس عن عجزى.
ولغزة عن عزلى.
للقاهرة عن زحمتى فيها. أو توهتى فى زحامها.
ولكل شارع ضمنى. ولكل حارة مازرتهاش. عن سيل جرفنى بقسوته وعبونى ع الاوناش.
عن كل كلمة خفت أقولها
ومرة مانجدتش غريق
باعتذر عن كل شىء
أنا باعتذر لك يا ندى.. عن ورد مافتحش..
وباعتذر لك يا مدى... عن حضن مابيساعش
وباعتذر ل الليل عن صبح مابيطلعش..
وباعتذر للنيل يروينا.. عطشناه..
وباعتذر للخير. عن بعضنا حوشناه..
وباعتذر للغنا.. عن ودن مابتسمعش..
وعن حمولة جتتى..أنا باعتذر للنعش..
للدمع والنحيب ولريحة الحبيب..
للمقرئ... واللى عزوا..
وحسرة الصديق
أنا باعتذر بحياتى للأموات. ولموتى بحياتى.
وباصفى نفسى من الوله بالذات. من كل لذاتى.
وباعتذر للضل بغيابى. وماكانش فى حسابى.
إنى اعتذر لك يا مطر عن رقصتى تحتك. ولا للبحار اللى ما بلت ريق.
باعتذر عن كل شىء
أنا باعتذر عن فرحى لدموعى.
وباعتذر للسكة برجوعى
وباحب جوعى يا شبع زايف. وباعتذر عن بصرى وأنا شايف
ان انت شايف يا كفيف عنى. انت الحقيقة وكلنا تلفيق.
باعتذر عن كل شىء
أنا باعتذر لله عن الصلوات.
وعن ركوعى وسجدتى سرحان. وخشوعى فى النسيان.
للاوليا عن كل أورادى.
وولادى وصحابى وحيطان البيت.
أنا باعتذر لطفولة ماكملتش. لرجولة ماقدرتش.
وكهولة ماتهزتش غير فى الخشوع لله ولا غيرها بيا يليق.
باعتذر عن كل شىء