أثارت أغنية "بشرة خير"، أزمة بين سلمى صباحي، نجلة المرشح الرئاسي حمدين صباحي، والملحن عمرو مصطفى، بعد أن نشرت "سلمى" الأغنية عبر حسابها الشخصي على "تويتر"، وكتبت "بتكتب بكره بشروطك، دي بشرة خير.. يا كل المقاطعين.. واحنا ويا بعض أقوى وأملنا كبير". وفوجئت سلمى، برد حاسم من عمرو مصطفى يعرب فيه عن مدى كرهه لوالدها صباحي، قائلًا: "عزيزتي سلمى صباحي.. انتي عارفة إني مبحبش بابا ومش عارف هو بيشتغل إيه؟ وأغنية بشرة خير لحني على فكرة، وطبعًا لحني تبقى تحيا مصر فاهمة ولا الفهم بطيء زي بابا"، فلم تجد نجلة صباحي، سوى الرد عليه وبدأت الكلام بجملة "مش عزيزي عمرو مصطفى.. معلش مقدرش أقول عزيزي لحد مش عزيز عليا فعلًا". وتابعت: "ليه بتجر شكلي.. ده أنا لسه بشكر في الغنوة، أنا عارفه إن الغنوة لحنك وعارفة إنك مؤيد للسيسي، وعارفه إنك مبتحبش حمدين وواثقة إنك مابتحبوش عن جهل، زي بالظبط مانت مش عارف بيشتغل إيه عن جهل، وزي ما بتقول وبتردد كلام كتير جدًا عن جهل برضه، بس ده مالوش أي علاقة بأن الغنوة فعلًا عجبتني.. الفن بالنسبة لي أنقى وأرقى من التوجهات والاختلافات والغنوة كلام قبل ما تكون لحن.. وما نكرش إن اللحن اللذيذ اللي شبه كل ألحانك المنحوتة عجبني برضه.. أنت معروف عنك من أيام الجامعة أصلًا إنك (نحيت) شاطر بصراحة.. دي حاجة معروفة في الوسط كله مش أنا اللي اكتشفتها حتى اسأل أي حد". وأردفت، "بص أنا عارفة إن قلبك طيب جدًا لما شفتك صدفة في صدى البلد بعد ثورة يناير بكام شهر، وجيت سلمت عليا واعتذرت لي عشان كنت كاتب عني على صفحتك دي برضه أني منفعش مذيعة لأني (تخينة وفاشلة).. قد إيه ساعتها عرفت إنك سطحي لدرجه مرعبة، والمصيبة إنك وقتها قلت كده بس عشان مبتحبش حمدين، مش عشان شوفتني فعلًا لا أصلح كمذيعة". وتابعت في مخاطبتها لعمرو مصطفى، "في كل الأحوال أنا شايفة إن الانتخابات مش مفروض تخسر الناس بعض، أكيد مبتكلمش عني أنا وأنت لأننا أصلًا مش أصحاب، لكن عمومًا متحاولش تخسر حد بكلام مالوش معنى.. أنا ليا أصدقاء بحترمهم جدًا منهم أيمن بهجت قمر هو مؤيد للسيسي، لكن عمر ده ما خلانا نجرح في بعض ولا نهين بعض، لأن أنا مؤمنة إن كل واحد حر في اختياره طالما عارف هو بيختاره ليه.. وكلمة تحيا مصر مش بتغيظني على فكرة، في كل الأحوال تحيا مصر طبعًا بغض النظر عن مين الرئيس.. كده كده تحيا مصر بناسها مش برئيسها". وأضافت، "بالنسبة بقى للبطء في الفهم، أنا مش هارد على الجملة دي وبدعيلك ربنا يشيل الغشاوة من على عيونك وقلبك وضميرك، عشان تعرف تشوف الحقيقه صح.. وفي الآخر ربنا يولي الأصلح عشان أهم حاجة مصلحة بلدنا". يذكر أن، الأغنية التي أذاعتها قناة "سي بي سي" حصريًا، للفنان الإماراتي حسين الجاسمي، من كلمات أيمن بهجت قمر، وألحان عمرو مصطفى، وتوزيع توما.