م الآخر| "خواطر أبو نضارة".. يا ريتني ما دوست "لايك"

1- إن كانت عقيدتك في القرن 21 إن اللي بنى مصر كان في الأصل حلواني، ابقى قابلني لو اتقدمنا (خرطة) واحدة.. قصدي خطوة واحدة؛ لأننا "هنلزق" في الصينية يا خفيف.
3- إلى كل من يقول "احنا اللي دهنا الهوا دوكو".. متفرحش أوي، انت كده عدو للبيئة.. يا راجل يا بيئة.
3- يا رب نغير بقى ثقافة التعظيم والتفخيم والتصفيق للرئيس المقبل، أنا عارف إن موضوع تفخيم الرئيس ده صعب علينا حبتين؛ لأنه موضوع قديم ومن أيام فرعون، اللي استخف قومه فأطاعوه، واستمر هذا الحال إلى مبارك.. اللي شرّبهم (حاجة صفرا) فانتخبوه.
4 وقعت "قطر" خطاب نوايا لشراء 22 مروحية عسكرية أوروبية بقيمة تقارب ملياري يورو، والنبي الواد "تميم" ده مضيع مصروفه على كلام فاضي، لأن الطيارات دي لو اشتراهم ورصهم جنب بعض فيه طيارة منهم المراوح بتاعتها هتبقى في البحرين.
5 نقلًا عن جريدة "الوطن"، زوجة تسأل.. زوجي طلقني شفويًا ثم ردني، هل أطلب منه نفقة طلاق؟، روحي يا شيخة إللهي تتشكي، أنا لو من جوزك أطلقك تاني.
6 تنظر المحاكم الآن دعوى إسقاط الجنسية عن "البرادعي"، طيب "توكل كرمان" مش واخده الجنسية بس دي واخده علينا اكتر من البرادعي، وبتدخل في شئوننا أكتر منه، هتعملوا معاها ايه دي؟.
7 أنباء عن موافقة قطر على (تجميد) دعمها السياسي والمالي للإخوان تمهيدًا لمصالحة خليجية، أعتقد أن الموضوع يتوقف على توقيت اتخاذ القرار، لو القرار اتاخد بالليل وطلع عليه النهار، انتوا عارفين ان الشمس في الخليج حامية أوي، وبالتالي موضوع (التجميد) ده الشمس هتسيحه.
8 أكثر دعاء لفت نظري على "فيس بوك"، (اللهم اكفني شر من يستغفلني)، وبعد ما دوست "لايك" بصيت على عداد اللايكات.. يااااه، ده المغفلين طلعوا كتير أوي، وطبعًا انا كنت منهم.. (يا ريتني ما دوست لايك).
9 عمرو أديب، توفيق عكاشة، سما المصري، باسم يوسف، تفتكروا لو قعدنا مع الناس دي عشان نكتب وثيقة شرف إعلامية، وكتبنا في مقدمة الوثيقة: إن الله تعالى يقول: "لاّ يُحِبُّ اللّهُ الْجَهْرَ بِالسُّوَءِ مِنَ الْقَوْلِ إِلاَّ مَن ظُلِمَ" اختار إجابة مما يلي: هيفهموا، هيتأثروا، هينفّضوا؟.
10 الفرق بين أفلام السبكي وبرنامج عمرو أديب، إن السبكي بيصرف ملايين على أفلامه، وممكن يكسب أو يخسر، أما عمرو أديب مبيصرفش ولا مليم على برنامجه، وبياخد فلوس.