عالم موازي

شعر

زمان أوى ...
من ييجي كام مليون سنة
كانت الشوارع و الحارات
والمساكن والبارات
يتدفُّوا فى حضن الجبل
وكنت انا
بفرش تراب اللامكان فى وسطهم
واتغطى بالتوت اللي كان فاضح و
مبيسترش
وانام ...
فاحلم كأنى بعيش فى بلاد
خلايق أرضها شبهي تمام
لكن حياتهم فيها السحر زاد
والجبل مبقاش بيحضن أيّ بيت
وكان بيركعله العباد
الأرض كانت كلها بتحكى عن
سقراط
وعن وجودي فى دنيته
وكنت شاعر فيلسوف
سلبت منه جنته
فاحتار مابين انه يعيش فوق جنتي
أو يستبيح دمي ويحكُم العباد
فرماني وسط المحكمة
صدر قرار إعدام قصايدي وبعده مُت
وهو من بعدى وقف في نفس
المحكمة
ومات
وصحيت .....
لقيتني حاضن حربتي
فخرجت من حضن الجبل
ومشيت على خطوات حقيقتي
المتعبة
شايف خطاوى مرعبة
تثبت بان مفيش هنا قوانين
تفرَّق القاتل عن اعمى بيسرق
العنين
وف وسط فكري اللى سرح
لقيت شجر عالي وواصل للسما
وفروعه كانت زى سقف
وضله مفرود وراسم ملحمة
بين الدفا والبرد
وكأني طرت
طلعت فوق صارى طويل
وكنت انا
أاول مغازل للشجر
وأول اللي غزلوا من فرعه سرير
وارتميت ..
وكانى طير فارد جناحه للسما
واتغطى بالريش اللي مرمي فوق
كتافه
ونام ...
وفى المنام
جاني منادي يهزني
ويسرق الحلم بقساوة بالرغم من
حنيته
بيقولي قوم آن الأوان تلحق طابورك
وانا كنت أبسط من بساطة طفل
شايل شنطته فوق الكتاف
وكان يخاف .. ينسى كتاب
المدرسة
فيكون كما الجمل اللي يحمل
موكب السلطان
فى صحرا بتفيض م العطش
ورغم القسا
لكنه صابه صبر من رب البريَّة
وحط فوق ضهره مدد يكفيه سنين
واستنى آخر رحلته
يمكن تنتهى
على باب بيحضن الملكين
من فوق كتافه
فينزل الحمل اللى شايله
عناقيد رطب م الطبطبة
ع الضهر بتشيل الأنين
وعدى وقت .. شهور سنين
كبرت فى عيون الصبي
وبقيت انا الصوت اللي بيصحيه
زى النبي ما بيدعى لرسالة إله
الله أكبر .. اتْبَع الصوت وانتفض
وحي على الفجر بصلاة
فيقوم يبوس خدي ويضحك
وينط يتوضا ويركع
واسمع الدعوة بتجري جوه روحه
يا رب .. اعفِ عن راجل يخاف الفجر يطلع
من قبل ما اكسب رحمتك
وينام ما بين ايديا يغيب فى حلمه
وانا أغمَّض عيني جمبه
ألقاني نايم فى السما
فى سرير يطير بين سحابتين
بيعيطوا
خايفين اسيبهم واختفي
لكني خوفت
واما حاولت ارجع مكان ما اتولدت
لقيتني نايم بين شجر وتراب وأرض
فاكتشفت بأنى سيبت أرضى وجيتلكم
عايش هنا...
لكن زمان حاولت اطير فوق السحاب
لقيتني حبيت التراب
فطويت جناحي وسيبت روحى فوق
ونزلت على أرضي ومُت