صورتك

شعر

كم ليل يبدلوا فوق همومك وكام قمر ف عنيكي بيضوي
وعنيكي دايماً طيبة .. بالحزن ولا بالأمل؟ معرفش أقولك
أصلي لما أتأملك ف الصورة بس بيرتعش قلمي بمحبه
ويرتبك من فعل نظرة مش عشاني
ويبتدي يرسم قلوب
تسقط قصاده لما بيرجع يفتكر .. كان قصده فعلا يكتب إيه عنك
الضحك ف عيونك بيرسم ميت طريق طب ليه أنا تهت أما شفتك ؟
ماحسبتش إن الدفة مش راضية تصاحبني
ولا إني عايش جوه واقع بيحدد محبة كل واحد بنوع موبايله وجزمته
حتى ف عبوره لأزمته
هيخش بار مفقور قوي؟
ولا يادوب يسكر من الوحده وهوى الكورنيش في نص الليل ؟
برضه بتوه انا في الكلام عنك .. واروح لمليون اتجاه وأرجع لأول ما ابتديت
قلبي مرعوش بالمحبة لما شاف في الصورة عينك
ولا همه لونها ولا إن ننيها مشاور للمدى ولا قالش فين
ولا حزن بادي ومرتبك يحزن على ايه ولا مين
وضحك متشرب أمل حيران مابين برواز حياته وبين
حرمانه من سكه مراده يروحلها
واحلام تحب الشخبطة ورجول بتعشق التنطيط على مزيكة الألوان
وطريق يودي للغنا بيموت في جملة ايه كمان
انا ايه بعدت كتير قوي ؟ ودا بس من صورة كان راسمها انطباع جايز يكون وقتي
يمكن تكوني بعدها فكيتي سور بروازك الفاضي وسرحتي
لكن أكيد لساكي حيرانه بأمل هتشخبطي الصفحة الجديدة وتبدي
هتلوني البرواز بمزيكا ماهيش بيحسها غيرك
مخلوقة بس عشان رجليكي تتحرك لسكة حلم كان تايه
في قلب بيحتفل بأربع خطوط حاجزاه عن العالم
رسمها بروازجي في ساعة زنقة وفي دماغه إن الزبون هيلاوعه في البيعه
صورتك