يوميات نائم

اليوم الأول
مجرد ما هصحى
هحاول أطير
و هفشل كتير
و هرجع أحاول بس بكسوف
و هفشل و أقول .. العتب ع الظروف
هبطل محاولة .. هبطل كلام
و هرجع أنام
لأن المحاولة أساساً حرام
اليوم الثاني
مجرد ما هصحى
هبطل سكات
و هكتب و هكتب
بدون إلتفات
لحد النهاية
لبعد الممات
هحاول أعيش
و تسألني .. مالك ؟
فأقولك مفيش
فتسألني تاني
فاحاول أموت
فتقتلني ( يعني كنوع م المساعدة )
و تمشي في جنازتي
و تاخد عزايا
بدون اهتمام
صحيح إن موتي ده حقي القانوني
لكن المحاولة أساسا ً حرام
اليوم الثالث
مجرد ما هصحى
و أصبح عدم
هحس بندم
و رغم إن موتي خلاص أتحسم
هحس بألم
عشان كنت بحلم في يوم لما أعيش
أعيش محترم
و يوم لما أموت
أموت محترم
مكونش ببساطة مجرد رقم
هموت في البلد دي
بطل أو شهيد
في بلدي البطولة لكرة القدم
في بلدي الشهادة لقب و السلام
في بلدي تحاول تموت محترم
تلاقي المحاولة أساسا ً حرام
اليوم الرابع
مجرد ما هصحى
هحزم همومي و طموحي بإيشارب
و أهيص و أطبل مدام فيها حرب
هنخسر هطبل
هنكسب هطبل
و هفضل أطبل
و عمري ما هسأل نهاية ده أيه
مدام اللي بيموت أنا معرفوش
مدام كل شهر بضمن فلوسي
هأنتخ براحتي و أمارس طقوسي
و أفضل أقلب ما بين البرامج
و راسم على وشي بعض إهتمام
و أحاول أسكت صوت الست بوسي
و هي مصرة تعيد الكلام
عبده .. حصل أيه .. عبده .. جرى أيه
يالهوي يا عبده .. باينك نسيت
يا عبده المحاولة أساسا ً حرام
اليوم الخامس و الأيام التي تليه .....
مجرد ما هصحى
هحاول أنام