م الآخر| نوسه وعمر.. عاوزين يتجوزوا

نوسة: ما ليش دعوة أنا عايزة أتجوز عمر؛ أنا بحبة وهو بيحبني، واتفقنا على كل حاجة، اشمعنى أنا اللى ما اتجوزش، ما هى بنت طنط درية اتجوزت الأسبوع اللى فات من د. تامر، وعملوا فرح كبير وطلعوا شهر العسل في تايلاند؛ مليش دعوة أنا عايزة وأروح تايلاند أنا وعمر.
أبو نوسة: مين؟ بتقولي إية؟
نوسة: بقولك عايزة أتجوز عمر، وأسافر تايلاند.. اشمعنى أنا، احنا اتفقنا على الجواز، وهو بيكلم مامته وباباه دلوقتى، هو لسة مكلمنى من شوية وقال إنة هايكلمهم.
أبو نوسة: واية كمان يا نوسة.
نوسة: هو هايجيب لي فستان أبيض أحلى من بتاع فافى بنت طنط منيرة اللي ماما كان عجبها، وكانت بتقول إنه أحلي من الفستان اللي جبتهولها فى الفرح واللي كنت مستخسر تدفع فيه الفلوس.
أبو نوسة: مين قالك الكلام دة؟
نوسة: ماما وهى بتكلم تيتة قالتلها الكلام دة، وقالت إنك كنت مستخسر تدفع تمن الفستان؛ أنت وتيتة لية؟ وانت بتهرب من الموضوع لية؟، عمر يجى امتى علشان يطلب ايدى.
أبو نوسة: الشمال وإلا اليمين.
نوسة: هى هاتفرق؟
ابو نوسة: هو مين عمر دة؟ وعرفتية ازاى؟
نوسة: عمر دة زميلي وأكبر منى بأربع شهور، بس علشان ما تقوليش في فرق سن وهانتجوز ونكمل سوا؛ انت عايزنى أعنس؛ أنا عايزة أفرح بولادى ويكبروا وأنا لسه صغيرة.
أبو نوسة: يا سلام انتي بتجيبى الكلام دة منين؟
نوسة: بجيبه من بقى؛ هو عمر عيبه إية؟ باباه ومامته اشتروا الشقة خلاص مش ناقص غير إننا نروح نشترى العفش.
أبو نوسة: كمان اشتروا الشقة من الوقتي!.
نوسة: يا سلام مش بيجهزوا لابنهم زى ما ماما بتجهزلى؟!
أبو نوسة: هى أمك بتجهز لك؟
نوسة: أة، ماما بدأت تجهزلى من دلوقتى؛ أنا سمعاها وهى بتقول لتيتة الكلام دة، وجابت طقم صينى إمبارح وعايناه عن تيتة.
أبو نوسة: الله الله اشجينى يا نوسة.
نوسة: سيبك من ماما دلوقت؛ أقول لعمر يجى إمتى؟
موبايل نوسة بيرن وتدخل البلكونة
نوسة: أيوة يا عمر؛ أنا بقول لبابا دلوقتى، ومش راضى يقولى تيجوا إمتى؛ هما قالولك هيجوا امتى؟
عمر: ما حدش راضى يرد عليا، ومسخسخين على نفسهم من الضحك.
نوسة: هما شكلهم مش عايزين يجوزونا.
عمر: خلاص نتجوز عرفى فى الفسحة واصحابنا يكونوا هم الشهود.
نوسة: خلاص أنا هاجيب الفستان الأبيض اللي ماما كانت جايبهولى فى فرح طنط منى والبسه هناك.
عمر: وأنا هاجيب البدلة الجديدة اللي بابا جابهالى.
"ملحوظة: نوسة عندها أربع سنين وعمر عنده أربع سنين وأربع شهور، عقبال عندكوا؛ اتجوزوا فى الفسحة والمهر كان مصروف عمر، وباكوا شكولاتة ووزعوا على أصحابهم مصاصة".