أنا بعينه

بحق إنك عشقتى نهارك وإنتِ فيه جنبى
بحق إنك عليتى ع القمر بيا
بحق إنى بقيت تابع لخيلاتك
وبمشى ف سكتك أعرف
وجودى ومطرحى فى ذاتك
ما أنا الأول
وأنا بعينه اللى ياما حلمتى تبقى له
وأنا بعينه اللى ياما فى فرشتك سافر
وأبوابك فتحتيله
أخدتينى فى حضنك
ألف ليل ورا ليل
شفتينى فى عز العمر
حلم جميل
ما أنا الأول
وأنا القاعده ف جناين مصر والفرحه
وأنا اللقمه اللى ياما إتقسمت بالنص
فى الفرحه
أنا شهور الحداد عندك
شهور عِده
وأنا الوحده اللى عشتيها سنين عافيه
وأنا القلب اللى رجلك جت له يوم حافيه
وحضنى
هربتى من حضنى
ضعفتى رجعتى من تانى
ونيلى كان عسل جارى
سكرتى ودقتى بشفايفك
بألف طريقه مختلفه !
أنا الورطه اللى سيبانى السنين ليكى
وبتسند على الذكرى عشان أقدر أعديكى
أعدى منين ؟
وأنا المسجون فى جرح وحلم مكملشى
وبتخفى فى روحى كتير
وبتخفى فى ليل ضلمه
وبتخفى ف برأة طفل مكبرشى
وبندم غصب على سنى
ولسانى بحاول أفوق من الكوابيس
وجيبانى ل ورا الأحاسيس
ما أنا اللى كتبت فيكى الشعر
حبيتك
وعليتك
وكانت نيتى صافيه
وسندتك وعديتك
فى وسط الزحمه فوقتك
رجع وعيك على الكرسى
وكنتى بتنطقى إسمك
وبعدين تنطقى إسمى
وتنسى الناس حوالينا
وتنسى تقدرى تحسى حاجات وحاجات
لواحد كان فى يوم أول
ولو يطول ما بينا سكات
منيش ساكت
كفايه عليكى عدو سنين وأنا ساكت
لا يوم توبتى
ولا عقلتى
أنا الفكره اللى جت لك
وإنت بتذاكرى
وشخبطى حروف إسمى فى كشاكيلك
ولونتى القلوب لونى
وأنا الحلم اللى لسه بتحلمى يجيلك
أجيلك ليه ؟
ما علمتك تدارى عليا الاعيبك
وتقوى عليا بعيوبك
عملت عيونى علشانك
ستاير كعبتك فيا
واقفلك صلب
تطوفى وتشربى منى
وتروى القلب
تحجى وتغسلى روحك
وسيبتك تطلعى جبلى
ولما زمامى زان كفك
بقيت بتزل
فى عز ما كنت أنا ف ضهرك
رجمتينى
وزى ما أكون سبب طهرك
رجمتينى
وأنا اللى سامحت كام مره
وعديتلك بدال الغلطه ميت غلطه
أقولك إيه !
لا كانت حجتك نافعه
دى حجه حرام
منيش محرم
ولا سلم بيوت الناس دى كانت كعبه للعشاق
ولا اللعبه دى كانت صح م الأول
ولا عرفتش أؤدى مناسك حب كان لحظات
ولا إنتى حاولتى تغتابى
وتحكى تقولى كان نفسك
أكون أول
وأكون أخر
ولا قدرتيش تزيدى خطوتين قدام
وتدارى ورا بابى
ونرجع تانى زى زمان
تعيشى فى حضنى
ونسافر