م الآخر| نصايح هامة للولاد والبنات اللي ناويين "الارتباط"

الحب والارتباط ومتطلباته مش متوقفة بس عليك وعلى شريك حياتك، ولكن على بيت وأسرة كل طرف فيكم، يعني لما تبقى في يوم رايح تزورها في البيت وتسهر معاهم، حاول تظبط مادياتك على إنك تجيب شيء للبيت ده وهدية لحبيبتك، ممكن تدخل بطبق شيكولاتة لطيف (في حالة لو أصحاب البيت مفيش حد منهم عنده السكر مثلا أو الشيكولاتة مضرة ليهم) لازم يوصلهم إنك بتفكر وبتحسن الاختيار، وممكن كمان تجيب بوكيه ورد لطيف لو هما أسرة لطيفة أو عاطفية، لأن في أسر عملية جدا بتشوف الورد بنظرة (تضييع فلوس)، وممكن هدية أنتيك للبيت، ومرة تانية هدية لوالدتها أو لوالدها.. الاهتمام بيريح!.
وطبعا أكيد هتختار هدية حبيبتك بعناية شديدة أيا كانت.
ولو انتي اللي هتروحي لأهله، المفروض تجيبي هدية لوالدته أو لأخوه (لو ليه أخ أصغر منه) أو لأخته، ده بخلاف هديته هو طبعًا.
وفي بعض النصايح في التعامل مع الأسرة التانية:
- حاول دايما توصل في الميعاد، لأنها انطباعات بمدى اهتمامك بالزيارة.
- لو هتاخدها وتخرجوا، خدها من البيت.. في حالة لو هي في البيت (لأنك بتدي رسالة لأهلها، أنا باخدها منكم انتم.. بعد إذنكم) ولو هي بتشتغل وأسرتها من النوع الديمقراطي قابلها بعد الشغل، ولو هما أسرة ملتزمة أو تحركاتها دايما بتكون بعلمهم، يبقى تكلم والدها وتطلب منه.
- لما تكوني رايحة عند أهله، احرصي دايما إنك متطوليش في الزيارة، حرصا على صورتك الشخصية قدامهم وخصوصا والدته.
- خليكي دايما على طبيعتك ولكن بره البيت في شوية نقط خللي بالك منها حفاظا على شكلك العام والاتيكيت، زي مثلا الضحك وطريقة القاعدة وطريقة الكلام، وخصوصا مع الكبار ف السن، لأن في مجتمعنا المصري الأهل للطرفين بيكونوا (رادار) مهما أظهروا الابتسامة والترحاب والمحبة، ولكن ده لأنهم خلال بداية العلاقة والخطوبة بيقيموا الشخص ده، (لأنه نسب)، وتأكدي إن حرصك ده مش من باب التقييد على طبيعتك أو حريتك، ولكن افتكري دايما إن أكثر الفتيات أنوثة (هما الملوك لأنهم دايما حريصين وبيفكروا قبل كل شيء بيعملوه) خليكي ليدي.. هو نفسه هينبهر بيكي.
- لازم تبقي انت وهي عارفين إن لكل مرحلة العلاقة الحرة- الخطوبة- الجواز، طريقتها في التعبير والتصريح، يعني في بداية الحب مش من الصحي للعلاقة الكلام عن المشاكل الأسرية، لكن فيه أساسيات المفروض تذكر زي (انفصال الأهل، شغلهم)، فترة الخطوبة ممكن تحكي لحبيبك على بعض من المشاكل الأسرية اللي ممكن يدخل هو فيها، لو لمستي فيه نقطة النضج والعقل، إنه هيحل مش هيفشي أسرار، يعنى خلاف بينك وبين والدك او والدتك مثلا.
- شيء مهم جدا.. زي ما بتبين محبتك ليها على انفراد، لازم تبينها قدام أهلها وأهلك.. لأن ده شيء بيريح قلبها ويسعدها، وانتي كمان نفس الكلام.
- أكثروا من (تسلم إيديك.. المدح في الشكل، أخد الرأي المعاملة كالأنثى والرجل).
- لو هتجيبلها هدية على سبيل المفاجأة، وألحت أنها تعرفها حاول تغير الكلام بشكل لطيف بدون إحراج.. لكن خللي بالك، هي من محبي المفاجآت ولّا لأ.. لأن بعض الشخصيات بتنزعج منها وبتتخض، سواء أنثى أو ذكر.
ده كان جزء من إتيكيت التعامل داخل بيت كلا الطرفين، وفى جملة انا مقتنعة بيها جدا "الاتيكيت هو لون حياتنا".