م الآخر| اقتحمها بلطف

في البداية، لازم نتفق على قاعدة أساسية، إن مفيش شخصية في الحياة غامضة بنسبة 100%، وإلا هتكون قاعدة في بيتها قافلة عليها أوضتها وميتة إكلينيكيًا.. أي شخص عايز تتعرف عليه، تعرف طبيعته وشخصيته، ركز على اهتماماته، يعني بيحب في إجازته يخرج فين؟، طبيعة الناس اللي بيرتاح في التعامل معاهم؟، هل بيحب الموسيقى؟ أنهي نوع؟، بيحب الضحك؟ هل طول الوقت ولا أوقات؟، عملي أكتر ولا زي ما تيجي معاه؟.. وعلى فكرة مش محتاجة سيرش على جوجل، ولا خريطة شخصية، دي حاجات مع الملاحظة بس هتعرفها، لكن أكيد محتاج إنك تركز معاه، لأنك معجب بيه.
جينا دلوقتي لمرحلة اشتري إيه؟ إمتى؟ وأقدمه أزاي؟، وأوضح إزاي إني معجب؟.
في حالة الولاد: البنات عمومًا بيحبوا الاقتحام بلطف، يعني افرض اهتمامك بس ما تفرضش نفسك عليها، اعتبارًا لحيثيات حياتها من أهلها وسنها وحياتها، يعني خلي الشئ الوحيد اللي ظاهر في الصورة، هو الاهتمام في حد ذاته مش إنت، ولو حسيت منها بإرتياح قرب أكتر شوية، وخللي بالك من حاجتين مهمين جدًا:
1- البنت دايمًا بتشوف الولد من منظور الرجولة، إنه مش بيضيع وقت، لو إنت عايز تصاحب خليك واضح من البداية، وهي وحريتها تقبل أو ترفض، ولو حب يعني عايز تكمل وتحلي الحياة بارتباط رسمي، وضح ده كمان.
2- لو إنت جاهز ماديًا ومعنويًا للارتباط، أو على الأقل عندك أساس الاستعداد مش بالكامل، خد خطوة، متبقاش لسه متخرج وتقول أنا عايز أحب وارتبط، لأننا في مجتمع شرقي، مش من السهل إنك تربط بنوتة بصداقة معاك، لأنها مش ولد.
يبقى فرق بين الصداقة والارتباط، وركز على استعداداتك للارتباط.
بالنسبة بقى لمسألة أول هدية، دي مهمة جدًا، كل البنات عملية أو بيتوتية، بتحب الهدية الرقيقة، بس مش لدرجة (وردة واحدة)، عشان تقدر يكون ليك الحق إنك تكلمها تاني، متقفلهاش منك، هههه.. لو متلخبط أو محتار، ممكن تجيبلها شئ يخص شغلها، لو هي حد عملي، يعني لو دكتورة سنان، هاتلها مثلًا شنطة لأدواتها شيك وعملية، ولو هي حد بيهتم بالفن والديكور، هاتلها شئ من شغلها فيه ألوان، وده هيوصلها رسالة صريحة مفادها (أنا مهتم بتفاصيلك).
في حالة البنات: الولد باستمرار لازم يحس إنك معتمدة عليه، حتى لو هو شخصيته مش قوية كفاية، مع توصيل إحساس إنك القائد مع بعض المشورة منكِ، واحرصي دايمًا في الكلام أن يكون صوتك على قد سمعه هو، لأن ما فيش ولد يحب إن البنت كلامها يكون مسموع للى حواليه، ده بيزعجه.
كمان متحاوليش ابدًا، تبيني إنك سبع رجالة في بعض، وإنه لو وقع في خناقة هتطلعي مطوة وتدافعي عنه، خليكي دايمًا فراشة معاه، حتى لو اتضرب ومتدافعيش عنه، لأنك أكيد مش أقوى منه، وهو وقتها ها يحب الضرب عشان خاطر عيونك "اديله كاريزمته وكيانه، وشاركيه وقت ما يطلب بطريقه لطيفة"، وكما يقال (كوني في نظره أنثى).
بالنسبة للمصارحة، متقوليهاش في الكلام بس وضحيها بالأفعال، من خلال اهتمامك بيه، بحياته، بشغله، شاركيه تفاصيله من غير تطفل، ولما تلاقي منه استحسان كملي، بس دايمًا خلي عندك "ميزان" تكملي إمتى؟ وتهدي الخطوة إمتى؟.
بالنسبة للهدية، الولد بيحب الحاجات الشخصية، لو بيحب الكرة هتيله "بادج" أو تي شيرت عليه لوجو الفريق، ولو بيحب الفن هاتيله آلة بيحبها، وهكذا.. متجيبيش شيكولاته أو ورد، لأنها هدية رقيقة، والراجل طبعه الظهور وفرض النفس، متعامليهوش على إنه "سوسن" يعني ههههه.