الأهلي حاضرا في مداخلات جمهور عمرو أديب :"الشماتة مش باينة عليك"

وجه الإعلامي عمرو أديب، سؤالًا للمشاهدين عن " إنت مع ولا ضد حصول الزوجة على نصف ثروة زوجها حال خيانته لها؟" وذلك خلال فقرة "إسأل مع رجاء" في برنامج "الحكاية" المذاع عبر فضائية "mbc مصر".
جمهور أديب أجروا مداخلات هاتفية للرد على السؤال، ولكن علق عدد منهم على خسارة النادي الأهلي المخجلة في دوري أبطال أفريقيا أمام صن داونز الجنوب أفريقي.
متصل لأديب: يا نحلة ولا تقرصيني ولا عايز عسل منك
"أحمد" من محافظة الجيزة، قال: "بالنسبة للتعليق بتاعك الأول على الأهلي بعد إذنك يعني انت عارف والله العظيم وأقسم بالله انا بحبك جدا بس المهم انا عايز أسألك سؤال يعني صريح: لما الزمالك اتغلب من النجم الساحلي 5-1 معملتلوش جزء من البرنامج ليه زي ما عملت مع الأهلي؟".
ورد أديب: "لا يا فندي عملنا ده احنا بنقف جنب كل الفرق والأهلي يا فندم بيمثل مصر والأهلي ده هو مصر ولازم نقف جنبه ونعمل له حلقة" لترد عليه رجاء الجداوي "خلاص يا عمرو" ويرد المتصل: "احنا مستغنيين عن وقفتك انت بالذات".
وعلق أديب قائلًا: "لا يا فندم لازم ده الناس تاكل وشي وتاقول الأهلي في محنة وعمرو أديب ميقفش معاه" ليجيبه المتصل: "احنا مسامحينك بس يا نحلة لا تقرصيني ولا عايز عسل منك".
ليلى: شماتك في الأهلي مش باينة عليك خالص
متصلة تدعى ليلى من القاهرة قالت بسخرية: "أول حاجة هقولك شماتك في الأهلي مش باينة عليك خالص وانت طالع نفسك الأهلي يكسب وباين على وشك".
ليرد أديب: "أنا نفسي الأهلي يكسب طبعا".
ساري: انا كزملكاوي سعيد الأسبوع كله
أما ساري من محافظة الشرقية قال: "انا كراجل زملكاوي سعيد النهاردة وتاخد نص الثروة وايه المشكلة يعني".
ليسأله عمرو أديب: "انت سعيد ان الزمالك اتعادل؟" ورد عليه ساري: "انا والله الاسبوع كله سعيد وايه يعني لما تاخد نص الثروة مش مشكلة يعني".