م الآخر| تحية إلى دفعتي

دفعه 2010 كلية التجارة وإدارة الأعمال قسم اقتصاد
أصدقاء العناء والمرمطة تحياتي وعزائي لي ولكم في مستقبلنا الذي دمّر قبل أن يبدأ دخلنا شباب زي الفل القسم اللي الكل بيهرب منه عشان صعب ومذاكرته رخمة قسم لا كتب له ولا مواد بل أبحاث ودور بقى على اللي الدكتور يقول عليه.
سنتين تخصص خسينا فيها النص بس بسعادة كانت الفسحة بتاعتنا في التعبئة والإحصاء كنا لما نهزر نتكلم عن أوضاع البلد السياسية والاقتصادية، كان هناك دكتور يقول لنا قسم الاقتصاد ده قسم (مترّبين) مش عيب فينا لا ده علشان هدومنا كلها تراب من كتر القاعدة في الأرض عشان نذاكر تحياتي له هذا الدكتور الذي لا طالما جعلنا ننام ونحلم بالاقتصاد القياسي.
كل ما فات ذكريات تحطمت بعد ظهور النتيجة ونجاحنا بتقديرات عظيمة وأخرج للمجتمع يا بابا بقى وأنحت في صخور الأسمنت لو عرفت تعمل حاجة بشهادتك لا دي المصيبة كمان إن انت لازم تعمل دراسات عليا طب وماله يالا نقدم لا معلش الكلية هتاخد درجات مرتفعة أعلى من اللي احنا جايبينه عشان العرب اللي بيدفعوا فلوس يبقى ليهم مكان مش احنا طيب يالا يا سيدي نروح فين نيجي منين لا لا دور على شغل تاني في مكان تاني بشهادة تانية خالص ولا ليك دعوة ب(بكالوريوس اقتصاد) وتجارة خارجية.
كمان لما بتنزل وظائف حكومية في أي مكان يكون بكالوريوس تجارة شعبة (أي حاجة) إلا اقتصاد.
لا كمان حبينا نعمل مجلة تضمنا كلنا بدل البهدلة بين الناس طبعا واجهتنا كل الصعوبات اللي خلتنا كل واحد يروح لحاله.
طب إيه يا جماعة.. ننتحر ولا إيه، ده القسم اللي حبيته ولا زلت متمسكة بكوني درست الاقتصاد ومصممة أن أبحث عن عمل في بلدي بهذا التخصص.
دفعتي.. تحياتي ليكم جميعا وأتمنى ألا نصل إلى اليوم الذي نندم على اختيار هذا القسم العظيم.