فيديو وصور| مواجهة ساخنة بين علاء مبارك وعمرو أديب.. «رد سجون» تشعلها

دخل الإعلامي عمرو أديب، مقدم برنامج "الحكاية" المذاع على شاشة "MBC مصر"، في معركة ساخنة مع علاء مبارك، نجل الرئيس الأسبق محمد حسني مبارك، بعد نشر الأخير، على حسابه الشخصي على "تويتر"، فيديو لعمرو أديب، يتضمن مواقف زعم أنها متناقضة له، معلقاً: "بدون تعليق".
وجاء رد عمرو أديب عنيفا على علاء مبارك، حيث استهل حلقة الأمس من برنامجه، بالحديث عن هذا الفيديو، وقال: "قليل أوي لما بشتغل على حكاية شخصية، اللي يقربلي هقربله، واللي هيهاجمني ههاجمه، ولو أنا سايبك ومش بقرب ليك مش معنى كدا إني خايف منك".
وتابع أديب: "النهاردة ذكرى تنحي مبارك، وفي أوقات كتيرة، أنا شخصيا كنت موجود في الوقت ده وأعرف مبارك وأبناء مبارك، علاء بيه وجمال بيه، وحصل اللي حصل ودخلوا السجن، وعمري ما قربت ليهم، لأن مش مرجلة ولا فروسية الناس تبقى في السجن فتشتمها، والنهاردة قعدت أفكر لو مكانشي مبارك مشي، كان هيبقى إيه الوضع، كان زمان جمال بيه بيحكم، وعلاء بيه بيقبض، أنا بتكلم بصراحة بقى".
واستكمل "أديب": "هتكلم دلوقتي علشان هما موجودين دلوقتي، أنا عمري ما قربتلهم، أنا قربتلهم وقت ما كانوا موجودين، وقعدت في البيت علشان قربت لجمال بيه، علشان استجريت وقربت لجمال بيه، ومصر كلها عارفة الحكاية دي، والنهاردة فجأة علاء بيه فكر يوم تنحي الوالد، اليوم الأسود في حياته، إنه يهاجم عمرو أديب وخد جملة من لقاء ومكملش اللقاء على الرغم من إنه عارف إن اللقاء ده هو اللي قعدني في البيت علشان قولت مينفعشي جمال يحكمنا، ويومها قفلوا الأستديو، وجمال وعلاء زعلوا".
وتابع: "علاء قرر النهاردة لأنه يا عيني حصلت ليه لوسة، والمصريين كل ما يكتب حاجة يقولوه أيوة يا باشا، قول يا عظيم، باشا مين وعظيم مين، هوا الراجل ده مش إنتو اللي شيلتوه، إنتوا نسيتوا عمل إيه هو وعيتله، هو علاء بيه نسي، إن كنتوا نسيتوا اللي جرا هاتوا الدفاتر تنقرا، لا هتكلم عن ال70 مليار، مش على آخر الزمن واحد رد سجون هيعلمنا الأدب".
واستكمل: "ولو كنت جدع أوي نتكلم بقى، وهسألك سؤال ورد عليا، الفلوس اللي في سويسرا دي بتاعة مين؟.. إنت عارف إني صحفي شاطر، الفلوس دي مثبته من الحكومة المصرية والسوسرية، هو في حد في مصر مكانشي عارف إنت بتشتغل إيه؟.. إنت اللي جبته لنفسك بقى، أنا عمري ما قربتلكو، بس الشيطان وزك، علاء بيه انتهى، والناس دي انتهت والطريقة دي خلصت، ولا إنت ولا جمال بيه هترجعوا تاني وتحكموا تاني، خلص نفسك الأول يابني والقضية وبعدين دوروا عليا، ليه اللف والدوران والهمز واللمز، جبته لنفسك وجيت عند واحد مستبيع".


واكتفى علاء مبارك بالرد بنشر صورة عمرو أديب مع تركي آل الشيخ، رئيس الهيئة العامة للترفيه في المملكة العربية السعودية، معلقا: "هو الأستاذ عمرو مش فاهم حضرتك، أنا لا أقصد أعلمه الأدب لا سمح الله، بحاول أعلمه وأفهمه معنى الرجولة".