للمبسوطين بس

صبح صبح.
اقعد كده وخد نفسك.
طفي نور الأوضة.
سكت كل الأصوات اللي حواليك.
طبعا مش حاينفع أقولك غمض عينك، عشان مش حاتعرف تقرا فحقولك طفي دماغك! شيل منها كل فكرة وكل هم وكل عكننة وركز معايا خمس دقايق بس، ومين عالم يوضع سره في أضعف خلقه يمكن أعرف أفرفشك.
تخيل كده إن النهاردة يوم فرحك.. صحيت من النوم على صوت التليفون وسمعت محمد نور وهو بيقول (تعرف حبيبي قد إيه اليوم ده ياما حلمت بيه وعشت مستنيه ليالي) وأول ما رديت سمعت أجمل صوت في الدنيا وهو بيقولك "أيوة يا حبيبي عامل إيه).. تخيل وانتوا بتتكلموا راحت قايلالك "تخيل يا حبيبي إن احنا النهاردة حانبقي مع بعض لآخر العمر؟ يا ترى ساعتها حاتحس بإيه. طيب حاتقولها إيه ساعتها؟ فاكر اول يوم كلمتها فيه؟ فاكر لما كنت ماشي بتتكعبل من كتر التوتر وانت مش عارف تكلمها ولا لأ؟ فاكر وشها لما احمر أول ما سمعت منك كلمة بحبك؟ فاكر انت عملت إيه لما قالتلك وأنا كمان؟ طيب فاكر لما كنتوا بتتفسحوا مع بعض في عز الشتا وإيديكوا في إيدين بعض؟ فاكر كنتوا بتقولوا ايه؟ فاكر يوم ما اتقدمتلها؟ فاكر لما لبست البدلة وانت متضايق عشان مش بتحب تلبس كلاسيك، وكنت ساعتها بتقول كله يهون عشانها؟ طيب فاكر هي لما جت وسلمت عليك وكانت ساعتها زي القمر؟ فاكر كان نفسك تقولها إيه؟
طب سيبك من ده، خش معايا في الجديد.. تخيل نفسك كده بتلبس ونازل علشان تروح تجيبها من عند الكوافير. حاسس بإيه؟ نفسك تعمل إيه؟ طيب مش نفسك تقول حاجة؟ أكيد انت مبسوط، مانت أكيد افتكرت انتوا كام مرة اتخانقتوا وكام مرة كنتوا حاتسيبوا بعض، وكام مرة كنت بتقول ياترى الموضوع ده حايكمل لآخره ولا لا.. تخيل إن هي قدامك دلوقتي حاتقولها إيه؟ إوعى تقولي حاقولها بحبك، ما هو أكيد انت بتحبها.. أمال كل اللي انت كنت بتعمله عشانها ده كان إيه؟ لازم تكون مبتكر، لازم تقول حاجة محدش غيرك قالها.. طب لو قالتلك تغنيلها حاتغنيلها ايه؟ ما يحرمنيش منك بتاعت تامر حسني؟ ولا بقدم قلبي بتاعت عمرو دياب؟ ولا يمكن الفستان الابيض بتاعة العسيلي؟ ولا أجمل نساء الدنيا بتاعت صابر الرباعي؟ ولا ولا ولا.. لا، طيب مفكرتش إنك انت تكتبلها أغنية؟ لو فكرت طيب حاتكتبلها فيها إيه؟ أصل أي كلام في الدنيا حايبقي شوية على اللي انت حاسه وعلى اللي انت عايز تقوله.
طيب سيبك من الكعبلة دي وارجع معايا تاني.. إحنا دلوقتي قدام القاعة وداخلين خلاص الفرح.. دلوقتي انت حاتشوفها في فستان الفرح، ودلوقتي هي حاتقولك بحبك من غير ما تتكسف، ومن غير وشها ما يحمر، ودلوقتي انت حاتقولها احنا بقينا لبعض من غير ما تخاف من حد.. غمض عينك كدة دقيقة وتخيل الموقف ده، وتخيل انت حاتقول إيه ساعتها.. على فكرة دي حاتبقي أجمل واحسن قصيدة اتكتبت في التاريخ! مش عشان القافية مظبوطة ولا عشان كلامها حلو، لا بس عشان القصيدة دي كل حاجة فيها طالعة من قلبك ومفيهاش مبالغة.. تخيل وانتوا بترقصوا مع بعض وإليسا عمالة تغني وتقولك ع بالي حبيبي.. حاتحس بإيه ساعتها؟ يمكن تكون قبل كده حسيت إنك اتسرعت وإن انتوا ماتنفعوش لبعض! لكن دلوقتي بذمتك مش حاسس بفرحة كبيرة أوي؟ بذمتك مش اتأكدت إنك كنت حاتعمل غلطة عمرك لو كنت بعدت عنها؟ طيب سيبك من الكعبلة دي.. أي حد، ولد أو بنت وهو بيقرا الكلام ده فكر في حد معين؟ وياريت مفيش داعي للإنكار لأن احنا بشر مش حجر، ولأي حد فكر في أي حد وهو بيقرا الكلام ده خد من النصيحة دي:
He \ she is the one
مهما كانت الصعوبات، ومهما كانت المعوقات، إسعوا ليه وماتسيبهوش لحظة واحدة، عشان ساعتها حتى لو فشلتوا حاتقولوا "يكفينا شرف المحاولة".