بالفيديو| رامي رضوان ل رحمة خالد: متألقة.. ولا يهمك من التنمر

طالب الإعلامي رامي رضوان، رحمة خالد، أول مذيعة من ذوي القدرات الخاصة، بعدم أخذ التنمر بها في الاعتبار، قائلا، "متزعليش من التنمر إحنا طول الوقت عايشين فيه، بيتريقوا عليا وبيتريقوا على آية، أدائك كان زي الفل، أول مرة طلعت على الهواء كنت مرتبك، إنتي تألقتي أكتر مني بكتير".
ودعا رامي رضوان، خلال حديثه في برنامج "8 الصبح"، المذاع عبر فضائية "dmc"، لالتقاط الصور التذكارية مع رحمة بمناسبة تقديم أول إعلامية مصابة بمتلازمة داون لبرنامج على الهواء مباشرة.
وقالت رحمة، "في ملحوظة بس عاوزة أقولها علشان من إمبارح وفي ناس بيهاجموني، وبيقولو إزاي رحمة بقت مذيعة.. هو ده مش تنمر؟.. بلاش تحبطوني وأدوني فرصة، ولو غلط أنا بتعلم".
ووجهت رحمة سؤالا للدكتورة مايا مرسي، رئيس المجلس القومي للمرأة "دكتورة مايا هل كنتي تتخيلي يوم تقعدي قدام مذيعة من ذوي القدرات الخاصة؟"، وردت مايا مرسي، "عمري ما كنت أتخيل.. بس النهاردة كان من أكتر البرامج اللي كنت قلقانة هتسأليني إيه وهجاوب عليكي إزاي كان البرنامج بتاعك".
وتابعت مايا، "القدرة غير العادية اللي شوفتها عندك النهادرة تخليكي مايكونشي عندك أي نوع من الإحباط، أما التنمر فهو أصبح عادة عليكي وعلى غيرك.. المجتمع أصبح يتنمر بأي حاجة، ومتخليش أي حاجة تحد من طموحك، ولا حاجة تجيبلك إحباط، استمري إنتي بتفتحي باب لناس كتير أوي، وبتدي أمل لأمهات يشتغلوا على ولادهم، وبحيي مامتك، وبحيي DMC على تدريبك، والاحترافية اللي ظهرتي بيها، ولا يهمك من التنمر".