أتمنى منكم قبل قرأة الموضوع، ألا تنشغلوا بأي شىء آخر، حتى يصلكم الإحساس المطلوب. حبيبى أخبارك إيه؟، واحشني جدًا.. مش عارفه ليه النهاردة حسيت أنى عايزة أكلمك؟، إنت وحشتني قوي النهاردة.. مش معنى كده إنك ماكونتش بتحوشني، إنما النهاردة إحساس مختلف، عايزة أكلمك كتير وأحكي معاك.. قولي أخبارك إيه في الغربة، وبنوحشك ولا لأ؟. حبيبتي إنتي دايمًا في بالي.. إنت كمان وحشاني، أنا حتى كنت بفكر أنزل أزوركم وأرجع تاني في السريع.. صحيح قوليلي الأولاد عاملين إيه؟ أحمد لسه شقي زى ما هو؟ ومريم لسه بتكسر وتبوظ الحروف ولا إتعلمتها؟.. الولاد وحشوني قوي. ما أنت ياحبيبي اللي باعد ومش عايز تنزل، 18 سنة مشبعتش منك، دا حتى لما تيجي زيارة، بتبقى زيك زي العيد، تيجي وتروح بسرعة.. فرحة وبتمر.. إبنك دلوقتي كبر وعقل وفي الثانوية العامة، ومريم ما شاء الله بقت عروسة، وبتتكلم زي الفل. صلاح عايزة أسألك سؤال؟.. إسألي يا آمال. هو إنت لسه زي ما أنت؟، أقصد يعني لونك وشعرك، ياترى لسه بقوتك ولا ضعفت؟، ياترى لسه ضحكتك بتملى الدنيا ولا ساكتة جواك من الغربة؟، ألف حاجه نفسي أعرفها.. يا ترى لما تشوفني هكون حلوة في عينيك ولا هتغير؟. آمال.. إنت دايمًا حلوة في عيني، وعلشانك ياستي هشتري كاميرا للكمبيوتر أشوفك وتشوفيني. آآآآآآآآآه.. يا مين عالم يا صلاح الوجوه هتتقابل تاني ولا خلاص، حسه إننا بنلف في الساقية، ولا أنت عارف تقف ولا أنا عارفة أقف جنبك.. فاكر يا صلاح، قلت هتسافر علشان نعيشة أحسن، ونأمن مستقبل الأولاد، يا ترى هي دي العيشة الأحسن ولا كنا بنخدع نفسنا؟!!. الأولاد فعلًا دخلوا مدارس أحسن، بس أصحابهم في مدارس عادية وأشطر منهم، جبنا كل اللي عايزينه، لكن تعرف يا صلاح الدنيا سرقتنا وضحكت علينا!!. آمال.. ليه الكلام دا دلوقتي؟، مش إحنا كنا بنحلم بعربية وشقة كبيرة وتعليم كويس للأولاد، ودا حصل.. هو كان في حل تاني؟. مش عارفه يا صلاح.. حاسه إننا إتفاوضنا مع الدنيا غلط.. خدت شبابنا وإديتنا شوية كراكيب.. من يومين شوفت صور الخطوبة، وأنا بضحك من قلبي وكلي أمل وفرحة، وشوفت صوري الجديدة.. الضحكة مش هي، والفرحة مش هي.. وكأني بضحك على نفسي مش ليها.. يا ترى لما نتقابل هنحس أحاسيس زمان؟، يا ترى هتمسكني من إيدى ونجري في الشارع؟.. ممكن يجي اليوم نقعد على الكوبري نأكل درة وحمص؟، هننزل من العربية ظهرنا مفرود ولا محني؟.. هنفعد في الشقة الكبيرة، ولا هنحن للشارع بتاع كل الناس؟، هنغازل بعض ولا كبرنا على المغازلة؟. حاسة إننا حسبناها غلط والدنيا غربتنا.. إرجع يا صلاح، نفسي أملي عيني منك. قولي هترجع إمتى صلاح صلاااح صلااااااااح ......... ...... وتوفي صلاح دون الاستمتاع بما تعب من أجله. حكاية بنعاشها وعارفنها.. بس يا ترى مين يسمع ومين يتعظ.. حقق أحلامك، ولكن أوعى الدنيا تتضحك عليك!!.
