كل حد

عجوزة خواجاية
وباعرف إنه يوم الحد لما بتظهر ف المكان
باين عليها الطريق من عندنا لهنااااك
باين على وشها إن العجوزة ف وقتها كانت حكاية
وان العيون كانت بتلمع للحبيب زى المرايا
ف كل حد نفس الطقوس
تدخل وتقعد وحدها
وبعد شوية تنادى ع الجرسون
بصوت قلقان.. مرعوش.. . كإنه بيعتذر عن كونه حى لحد دلوقتى
يمر الوقت.. . وهى معصبة عينيها بجورنال أجنبى
ما بين سطوره النظرة تتنطط زى العيال
على سلم البيت الكبير نهار جمعة
وبرغم ده نظرتها عادية
مابيضحكوش ولا يحزنوا لآخر طبعة م الأخبار
وسط العناوين الكبيرة والصور كانت غريبة
جواها بيدور على عنوان قديم مكتوب ف ورقة مكرمشة من ضمن أوراقها القديمة
ولما ماتلاقيش حاجة تونسها تساوى الصفحة فوق الصفحة بعناية
وتطويهم على دنيا ماتعرفهاش
وكالعادة تقوم تدفع حساب بيرة ماشربتهاش...