بنات اليورو.. يا رب اوعدنا

أول ما ابتدا كاس الأمم الأوروبية وتقليعة «بنات اليورو» لقيت نفسى بكتب على صفحتى على الفيس بوك: والله أنا حاسة إن بنات اليورو دول هيبقوا السبب الكبير جداً فى زيادة التحرش عندنا هنا فى شوارعنا، طبعاً من غير شك لقيت التعليقات نازلة ترف عليّا وأكيد تعليقات من شبان، شوية ضحكوا أوى وشوية حلفونى بإنى لازم أقول الحقيقة وأعترف إنهم «موزز ويستاهلوا» وناس اعترضت على فكرة التحرش (اللى هو أصلاً إزاى أشوفهم وبعد كده أتحرش بمصرية) وناس اتعقدت من جمالهم وقالت مين المعفن اللى هيفكر يبص لمصرية، وفجأة لقيت مقال كده على مدونة واحدة كتباه وعبارة عن 18 نقطة، مقارنة ما بين الأجنبية والمصرية بس مش فى الجمال لكن فى كل حاجة، أنا مش هناقش هنا أوجه المقارنة بس حابة أوضح حاجة أنا كنت كتبتها فى المقال الأخير اللى اتنشر هنا فى الوطن، إن الحلاوة والجمال مش فى الشكل لكن فى الروح، واللى يقولك انتوا مش حلوين زى بنات اليورو قوليلوا إحنا زى ماحنا واللى مش عاجبوا يروح يحب ف بنات بره، أنا أقدر أقول إنى أكتر واحدة بتشوف عامة الشعب كل يوم وعلى وشها تعابير مختلفة، وطبعاً عشان السيدات نصف المجتمع زى ما إحنا عارفين فأغلب اللى بشوفهم ستات، يا إما فى المترو فى عربية السيدات أو فى الأتوبيس كل يوم، الست من دول فيها حاجة غريبة، مشتتة وشاردة وبرغم كده متماسكة وقوية، مستحملة بيتها وعيالها وجوزها، أكل وشرب وتنضيف وكمان شغلها، بعد كل ده معندهاش وقت حتى تحط كحل ف عنيها، بنات ملتزمة جداً ورايحين كلياتهم ومشغولين بمستقبلهم وإنهم عايزين يحققوا ذاتهم وبرضو مش فاضيين يتجملوا عشان الوقت ضيق، لو حطوا حاجة ف وشهم عشان ينوّر شوية ولبسوا كويس يبقى فيه بهدلة ومضايقات، لو لبسوا أى جينز وعليه أى تى شيرت ولموا شعرهم ونزلوا من بيتهم كده عشان يتجنبوا المعاكسات يبقى مفرقوش حاجة عن الرجالة، الجمال مبقاش عارف يظهر فى ظل مجتمع منغلق على ذاته ووصل بيه إنه بيتفرج على ماتش مخصوص عشان يتأمل فى جمال «بنات اليورو».
لو سألت شاب من شباب اليومين دول وقلتله إيه هو مفهوم الجمال عندك؟ يقولك لما بتلبس كده كويس ويبقى الألوان ماشية مع بعضها ولما تحط أحمر وأخضر ف وشها مش تبقى شبه الشاويش عطية، وحد تانى بيفهم جداً ويقولك فيه جمال حسى وجمال روحى وإن الجمال الحقيقى بيكمن فى قوة شخصيتها وثقتها بنفسها، جمالها فعلاً مستخبى فى قوتها إنها مستحملة حاجات كتيرة قوى وبرغم إنها معندهاش وقت تتجمل إلا إنها برضو لسة جميلة، جمالها فى ثقتها بنفسها، صورتها قدام نفسها مش بتتهز طول ما هى واثقة فى نفسها مهما اللى قدامها قالها شكلك فيه حاجة غلط، الجمال مش لبس وماكياج ومش عدسات لاصقة ملونة، الجمال مش بنات اليورو ولا فاطمة ولا نور، الجمال جمال الروح الرقيقة البسيطة.