الإعدام ل«نور والشاطر وموسى»

المكان: حانة تبيع الخمور.
الزمان: مساء.
المتحدثان: مواطنان مسطولان يجلسان على منضدة أمام مرآة كبيرة.
مواطن 1: خيرت قابل موسى.
مواطن 2: مش ممكن؟ فعلاً؟ وبعدين؟
مواطن 1: شكلهم اتكلموا.
مواطن 2: فعلاً؟ طيب واتكلموا مع بعض فى نفس الوقت ولّا كان واحد فيهم بيتكلم والتانى بيسمعه، وبعد ما يخلص يرد عليه.
مواطن 1: غالباً، كان واحد بيتكلم والتانى بيرد عليه.
مواطن 2: يا رب استر، ليه بس كده؟ واتقابلوا فين؟
مواطن 1: اتقابلوا عند أيمن نور، وشكلهم اتعشوا كمان.
مواطن 2: لا حول ولا قوة إلا بالله. طيب، وهل هناك أى أخبار عن اتعشوا إيه؟
مواطن 1: مش عارف، بس انت عارف أيمن.
مواطن 2: آه طبعاً، أكيد المحمر والمشمر والمشوى. بس انت عرفت إزاى؟
مواطن 1: بيقولوا واحد سرب الخبر وأيمن زعل وموسى زعل.
مواطن 2: زعلوا ليه؟
مواطن 1: خايفين للناس تقول عليهم إنهم بيقابلوا خيرت.
مواطن 2: طيب وده يزعل الناس فى إيه ما كل السياسيين فى العالم بيقابلوا بعض؟
مواطن 1: مش عارف، بس هو إحنا زى العالم، ولّا السياسيين بتوعنا زى السياسيين بتوع العالم؟ ما انت عارف الشعب المصرى الشقيق انقسم إلى ميليشيات سياسية: ميليشيا سياسية إخوانية، وميليشيا سياسية سلفية، وميليشيا سياسية ليبرالية، وميليشيا سياسية يسارية.
مواطن 2: طيب والميليشيات دى مش المفروض إنها تكلم بعضها بدل ما يدمروا البلد. ولا همّا ناويين يدمروا البلد؟
مواطن1: والله مش عارف. أحياناً باحس إنهم همّا نفسهم مش عارفين همّا عايزين إيه.
مواطن 2: بس لازم نعرف.
مواطن 1: طيب ما تيجى نسأل الاتنين اللى قاعدين أمامنا دول، تعالى نروح لهم!
يتحرك الاثنان وهما ينظران إلى المرآة، وفجأة يقول مواطن 2: استنى، دول شكلهم جايين يقعدوا معنا.
مواطن 1: آه أحسن برضه علشان يبقى همّا اللى جولنا مش إحنا اللى رحنالهم. اقعد اقعد يا راجل.
مواطن 2: ودى تفرق فى إيه؟
مواطن 1: مش عارف.
مواطن 2: إيه ده، دول قعدوا تانى. شكلهم مش جايين.
مواطن 1: أحسن برضه، بلا وجع دماغ.
مواطن 2: هو انت عايز إيه؟
مواطن 1: ولا حاجة، هو إحنا كنا عايزين منهم إيه؟
مواطن 2: كنا هنسألهم عن الناس اللى قابلت بعضها دى.
مواطن 1: أى ناس؟ انت مين؟ أنا مين؟ فيه إيه؟
مواطن 2: آه صحيح: انت مين؟ انت هنا ليه؟ فيه إيه؟ همّا هيضربونا تانى ولا إيه...؟ حرام، حرام....
وتنتهى الحكاية، كما بدأت. وكما قال أرسطو: علىّ النعمة ما حد فاهم حاجة.