وحين سئل عن رأيه فى الإخوان المسلمين راح متعازم لك م الهوا وقايل بالفم المليان: - قتلة. فقيل له: - قتلة قتلة يا أستاذ؟ فكررها بحسم: - قتلة قتلة قتلة. ذلكم هو الأستاذ محمد حسنين هيكل الصحفى العجيب الشهير فى الشارع المصرى ب«ميكى» نسبة للبهلوان البلاستيك ميكى ماوس، الذى يؤدى جميع الحركات البهلوانية ويتخذ جميع الأوضاع بقدرة ورشاقة بالغة، وروح يا زمان وتعالى يا زمان وقوام قوام شفنا وسمعنا أن الأستاذ مسافر الدوحة، الدوحة عاصمة دويلة قطر الراعى الرسمى ل..... - الأستاذ مسافر الدوحة؟ - أى نعم وفيها إيه دى؟ - فيها إيه إزاى؟ دى الدوحة دى عاصمة قطر. - وافرض أنها عاصمة قطر مالها قطر؟ - إنت ماتعرفش أن قطر هى الممول الحصرى لجماعة الإخوان المسلمين؟ - ما أعرفش إزاى إذا كان العالم كله عارف. - يا ناس أنا مخى حيتنقل. - ما تسيبه يتنقل من باب التغيير والتغيير مش وحش. - طب ما قالوش الأستاذ مسافر الدوحة يعمل إيه؟ - مسافر يلقى محاضرة يا غبى. - محاضرة إيه عدم المؤاخذة؟ - وانت مال أهلك. - طب حيلقى المحاضرة فين؟ - فى جامعة جورج وسوف باين ولا هى جورج تاون. - بس أنا أعرف أن الأستاذ دبلوم تجارة متوسط. - يا أخى بطلوا حقد بقى. - يا عم حقد إيه أنا بس مشفق على الأستاذ بعد ما قال وأكد أن الإخوان قتلة حيرجع يقول عنهم إيه؟ - يقول اللى يقوله انت مال أهلك. - خلاص يا سيدى حقك على راس أمى. - ؟؟؟؟؟؟؟ ومين عارف مش يمكن انت كمان تسافر تلقى محاضرة فى الدوحة؟ - لا يا سيدى الله الغنى عنك وعن الدوحة. *** ورحل أيضاً الملحن الموهوب حمدى رؤوف «أبو أحمد» مبدع موسيقى وأغانى مسرحية «الملك هو الملك» التى أبدعها شاعر المسرح العربى الراحل سعد الله ونوس، وتشرفت أنا بكتابة أغانيها واستعراضاتها التى غنى معظمها المطرب محمد منير، وكم كان بودى أن أسافر إلى الإسكندرية معشوقتى لأكون بجانب «إلهام» أرملته وأولاده الذين أعتبرهم أولادى، ولكن الظروف كانت أقوى منى ومن وقع المصاب الأليم على نفسى.. وداعاً حمدى رؤوف وجزاك الله خيراً على ما قدمت لنا من إبداع أصيل، ومعذرة للقراء الأعزاء إذا لم يكن يمضى أسبوع على رحيل الدكتور أشرف سلامة حتى لحق به حمدى رؤوف، والراحلان من أعز أصدقائى ولكن ما ذنب القراء؟ يا مصر وانتى الحبيبة وانتى اغترابى وشقايا وانتى الجراح الرهيبة وانتى اللى عندك دوايا علمنى حبك عبارة سهلة وبسيطة وعفية شرط المحبة الجسارة شرع القلوب الوفية
