أثار احتشاد المئات أمام المراكز التجارية، من أجل شراء مستلزماتهم من "الملابس، وأدوات التجميل، الأجهزة الإلكترونية"، بمناسبة "الجمعة السوداء"، سخرية رواد مواقع التواصل الاجتماعي. وقالت إحدى مستخدمي مواقع التواصل الاجتماعي على "فيس بوك" وتدعى صابرين "أيوة إحنا الشعب اللي معهوش فلوس وعايزين نعمل ثورة جياع عشان مش لاقيين ناكل، بس لاقيين نجيب هدوم برندات ووقفين طوابير من قبل الصلاة". وأضاف حساب يدعى نور "الناس دلوقتي لا عارفة تجيب أكل، ولا عارفة تجيب هدوم كفاية الأسعار، لما تكون بلوزة خفيفة ملهاش لازمة في محل عادي مش في براند كمان، وتبقى 450 جنيه الناس بقي تعمل إيه تموت من البرد طبيعي هيروحو في وقت في تخفيض بس حتى التخفيض سعره عالي". أما "عزة" قالت، "هما المفروض يقفوا طوابير عشان يلبسوا؟ مش يتوفر لهم اللي يلبسوه عشان ميقفوش كده؟ دول شباب جامعة رايحين على أمل أن يبقى عندهم ولو حاجة واحدة حلوة وشيك يلبسوها في المناسبات زي باقي ولاد الناس". وأضافت، "كفاية نقد وافتراء هو الفقر مواصفاته إيه في نظركم، ربنا يسعد أيام كل شبابنا، ويدي كل واحد اللي يتمناه، كفاية بقى سواد القلوب والنظرة الغبية الضيقة، وعلى فكرة ممكن يكونوا رايحين عشان يتفرجوا، ودي مش عيب ولو أني أتمنى أنهم في يوم يقدروا يشتروا كل اللي نفسهم فيه ويبقوا شبعانين". وكان مهرجان الخصومات العالمي "Black Friday" الجمعة السوداء، انطلق منذ ساعات قليلة، في جميع المراكز التجارية المنتشرة في القاهرة والجيزة والإسكندرية.
