المرة دى ناصر

المرة دى
هجرى عليك
والمس إيديك وسط الطريق
هزرع كلامك ع الرصيف
واحلم
يا حلم ساكن دمنا العربى
فاتت سنيين
والقلب بيناضل
لو يوم يموت الشرف
مين فينا هيناضل؟
المرة دى
هحضن ضريحك باشتياق
وانتشى من ضحكتك
هبكى عليك ناصر
كل اللى واقفين ع الطريق بعدك
حلمهم قاصر!
وانت الحقيقة المستحيلة الممكنة
ضحكة الأمة اللى ماسكة أرضها بإيدها
دمعة الطفل اللى واقف ع الطريق
وحده
على اليمين جثة
وع الشمال أنقاض
صرخ بدمعه (ياااا عرب)
دمه ف عروقك فاض!
واقف
كما قمر الليالى المعتمة
بتطل دايما ع الغلابة ف ليلهم الداكن
تنزل دموعهم م الوجع
فبدون إرادة تتوجع
وتحس نفسك دمعهم ساكن
ناصر
يا ضحك عمال المصانع
واحتضان السد للمية
يا ضحكة القدس الجميلة
واشتياق بعد السنين
لسه بيجرى ع الأمل بيا
المرة دى
هفتح كتاب ع النكسة وافتكرك
هبكى على الفارس
الصلب ف الشدة
وافرح بوقفة شعب ف الشارع
ماسك ف حلمك قوى
حالف ما ياخد عزا
حالف يموت ع الأرض!
لملم كلامك يا فتى
وارجع
الأمة واحدة والدراع واحد
النصر جى أكيد
طول ما احنا ع السكة
يا صوت غلابة الوطن
يا أنة الشارع
صاب الخريطة الوجع
صاب الجميع الصمت
الكل ناسى دمنا وتارنا
إنت رحلت خلاص
واحنا
فضل عارنا
كان ليه بقى؟
كان ليه تجينا م الزمن
وتقولنا نحلم؟
كان ليه تكبر عشقنا أوطان
كان ليه تخلينا جنود لاجل الوطن؟
يا دى الوطن
مات الولد
والمركبة غرقت معاه
الكل سابك ع الطريق تبكى
ناصر رحل
فابكى بمرارة ع البطل
واشتاق
ناصر رحل
رغم إنه موجود ف النجوع
ف الشوارع
ف الحوارى الضيقة وجوة القلوب
المرة دى
هحضن كلامك بالقوى
واثبت ف ساحة المعركة
راح اموت
عشان فكر انزرع جوة الوريد
يا نموت سوا
يا نحقق الحلم البعيد
راح اموت
وانا حاضن خريطتى بين كفوفى
ضحكتى وطنى
أنا فى انتظارك
يا بطل أجمل زمن
يا حق مدفوع التمن
أنا فى انتظارك ع الطريق