الإخواني أحمد المغير: "الخونة داخلنا" سحبوا السلاح من رابعة قبل الفض

اعترف أحمد المغير الكادر الإخواني الشاب، والمعروف باسم "فتى خيرت الشاطر"، أن اعتصام رابعة، الذي تحل ذكرى فضه الثالثة اليوم، كان مسلحا، وكان يضم أسلحة آلية وقنابل يدوية.
وكتب المغير، في تدوينة عبر صفحته الشخصية على فيس بوك تحت عنوان "سرية طيبة مول": "طيبة مول، المكان ده كان عارفينه أهل رابعة على أنه المكان اللي وراء طيبة مول المطل على شارع أنور المفتي، المكان ده كان مميز جدا وكان مشهور على إنه مكان إقامة "الجهاديين"، سرية طيبة مول ليهم حكايتهم الخاصة، وغالبا هيفضلوا مجهولين للأبد".
وتابع "معظم السلاح في رابعة كان تم إخراجه بخيانة حصلت، ولم يتبق إلا سلاح سرية طيبة مول، اللي كانوا جايبينه بفلوسهم الخاصة، ومكنش لحد سلطان عليهم، الاعتصام ده لم يكن بالإمكان فضه نهائيا لو كان سلاحه فضل فيه، بس الهزيمة كانت من الخونة داخلنا، وما زالت".
وأضاف "يوم الفض كنت موجود مع شباب طيبة مول، مكنتش عارف حاجة أكتر من إن فيه سلاح وإن مفروض في خطة مواجهة إذا حصل اقتحام، الساعة 6 صباحا تقريبا بدأ الاقتحام من جهة شارع أنور المفتي وشارع الاتوستراد من جهة طيبة مول، 5 دائق غاز، وبعدها بدأ الرصاص الحي مباشرة، انهارت خطوط الدفاع اللي الإخوان كانوا مسؤولين عنها طبعا خلال ربع ساعة، الخطوط اللي اتسحب سلاحها قبلها بيومين واتسابت في مواجهة ظالمة جدا مع شرطة وجيش، بدأ الشباب في طيبة مول بالرد على الرصاص برصاص، كنا متحصنين في المبنى اللي وراء طيبة مول، قوات الاحتلال مقدرتش تقتحم النقطة بتاعتنا لكنها اكتسحت أنور المفتي والاتوستراد وبدأت تتقدم وإحنا في النص، مع كل دقيقة الحصار بيطوقنا والشباب بيجري كله ناحية المنصة والغاز والرصاص في كل مكان، وحدهم شباب طيبة مول ثابتين جدا ومتوزعين بيقاوموا بكل قوة غير عابئين باللي بيحصل، الحصار قرب يبقى كامل والكل بيجري، بدأت أكلم الشباب إننا هنتحاصر ولازم نتحرك فورا، فأقابل بابتسامة وثبات عجيب، وقررت إني أفضل معاهم ويكون مصيري من مصيرهم، ذهلت في نهاية اليوم أن ده كان قرار حياتي وإني لو كنت تحركت ناحية المنصة كنت هكون قتيل أو أسير، الشيء اللي هزني تماما وخلاني أعيد التفكير في كل شيء في حياتي وآخد طريقي اللي أنا فيه النهاردة".